ପାଳୁଅ ଲଡୁ

ପାଳୁଅ ଲଡୁ

ଭଦ୍ରକର ପାଳୁଅ ଲଡୁ
ଆରମ୍ଭ
ମୂଳ ଜାଗା	ଭାରତ
ଅଞ୍ଚଳ	ଓଡ଼ିଶା
ଲେଖାଳି	ଧନି ସାହୁ
ଖାଇବାର ସବିଶେଷ
ମୂଳ ଉପାଦାନ	ପାଳୁଅ, ଛେନା, ସୁଜି, ମଇଦା ଓ ଚିନି

ଇଂରାଜୀ ଲିଙ୍କ

https://or.wikipedia.org/wiki/Palua_Ladu

ପାଳୁଅ ଲଡୁ, ଭଦ୍ରକରେ ମିଳୁଥିବା ଏକ ମିଠା ।

ପ୍ରସ୍ତୁତି ପ୍ରଣାଳି

ପାଳୁଅ ମାଟି ତଳେ ମିଳୁଥିବା ଏକ ପରିବା । ଏହା କୋରାପୁଟ, କେନ୍ଦୁଝର ଆଦି ଜଙ୍ଗଳାଞ୍ଚଳରୁ ସଂଗ୍ରହ କରାଯାଏ । ପାଳୁଅକୁ ଏକ ପାତ୍ରରେ ପାଣିରେ ବୁଡେଇ ରଖିଲେ, ଏହା କିଛି ସମୟପରେ ମିଳେଇଯାଇ ପାତ୍ରର ତଳେ ବସିଯାଏ । ଏହି ମିଳେଇଯାଇଥିବା ପାଳୁଅକୁ ଛାଣି ଶୁଖେଇ ଗୁଣ୍ଡ କରାଯାଏ । ଏହି ଗୁଣ୍ଡ ପାଳୁଅକୁ ଛେନା, ସୁଜି, ମଇଦା, ଚିନି, ଗରମ ଗୁଆ ଘିଅ ଓ ପାନ ମଧୁରୀ ଦେଇ ଭଲ ଭାବରେ ଚକଟା ଯାଏ । ଏହାକୁ ଛୋଟ ଛୋଟ ଗୋଲାକାର ଆକୃତି ଦେଇ ଗୁଆ ଘିଅରେ ଛଣାଯାଏ । ତାପରେ ଏହାକୁ ଚିନି ସିରାରେ ପକେଇ ଲଡୁ ପ୍ରସ୍ତୁତ କରାଯାଏ । ଲଡୁ ଉପରେ କାଜୁ ବାଦାମ ଓ ଖିସମିସ ଦେଇ ପରିବେଷଣ କରାଯାଏ ।

ଇତିହାସ

ପାଳୁଅ ଲଡୁ, କେବେଠାରୁ ଆରମ୍ଭ ଏହାର କୌଣସି ଇତିହାସ ଲିପିବଦ୍ଧ କରି ରଖାଯାଇ ନାହିଁ । ତେବେ, ଗବେଷକ ଡ଼ ବାଇଧର ସାହୁଙ୍କ ମତରେ ଏହାକୁ ୫ଶହ ବର୍ଷ ତଳେ ପ୍ରସ୍ତୁତ କରାଯାଇ, ଭଦ୍ରକର ପ୍ରସିଦ୍ଧ "ବୁଢ଼ା ଗଣେଶ" ପୂଜାରେ ଭୋଗ ଲଗାଯାଉଥିଲା । ଅନ୍ୟ ଏକ ମତ ଅନୁସାରେ ପ୍ରାୟ ୧୦୦ବର୍ଷ ତଳେ ଶଙ୍କରପୁରର ଧନି ସାହୁ ଏହାକୁ ତିଆରି କରି ଭଦ୍ରକର ବୁଧବାର ହାଟରେ ବିକୁଥିଲେ । ପରବର୍ତ୍ତୀ ସମୟରେ ଗଙ୍ଗାଧର ସାହୁ, ସୁଧାଂଶୁ ସାହୁ ଆଦି ଏହାକୁ ଲୋକପ୍ରିୟ କରାଇଥିଲେ । ୧୯୬୩ ମସିହାରେ ତତକାଳୀନ ପ୍ରଧାନମନ୍ତ୍ରୀ ଜବାହରଲାଲ ନେହେରୁ ଭଦ୍ରକ ଆସିଥିବା ସମୟରେ ଉଦୟ ସାହୁ ତାଙ୍କୁ ପାଳୁଅ ଲଡୁ ଖୁଆଇଥିଲେ । ନେହେରୁଙ୍କୁ ଏହା ଭଲ ଲାଗିଥିବାରୁ, ସେ ଗୋଟିଏ ଖାଇବା ପରେ ଆଉ ଗୋଟିଏ ମାଗି ଖାଇଥିଲେ । ସେବେଠାରୁ ପାଳୁଅ ଲଡୁ ଭଦ୍ରକରୁ ବାହାରି ସମଗ୍ର ରାଜ୍ୟରେ ଲୋକପ୍ରିୟ ହୋଇପାରିଥିଲା ।

ପାଳୁଅ ଲଡୁକୁ ଏକ କୁଟିର ଶିଳ୍ପର ମର୍ଯ୍ୟଦା ଦେଇ, ପାଳୁଅର ଆମଦାନି ଓ ସୁଲଭ ଦରରେ ଯୋଗାଣ ବ୍ୟବସ୍ଥା କରାଯାଇପାରିଲେ ଏହାର ଲୋକପ୍ରିୟତା ଆହୁରି ବଢନ୍ତା ବୋଲି ବ୍ୟବସାୟୀମାନେ ମତ ଦିଅନ୍ତି ।