ରବୀନ୍ଦ୍ରନାଥ ମାଝୀ

ରବୀନ୍ଦ୍ରନାଥ ମାଝୀ (ଜନ୍ମ: ୨୨ ନଭେମ୍ବର ୧୯୫୨) ଜଣେ ଭାରତୀୟ ଓଡ଼ିଆ ଭାଷୀ ଶିଶୁ ସାହିତ୍ୟିକ । ସେ ୨୦୧୩ ମସିହାରେ ନୀଳ ଠେକୁଆ ପୁସ୍ତକ ପାଇଁ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର ପାଇଥିଲେ । ତାଙ୍କର ଅନ୍ୟାନ୍ୟ ରଚନା ମଧ୍ୟରେ ବିଜ୍ଞାନଭିତ୍ତିକ ଶିଶୁସାହିତ୍ୟ ପୁସ୍ତକ ପଢ଼ି ଶିଖ ଗଢ଼ି ଶିଖ ଓ ଗୀତରେ ଗୀତରେ ବିଜ୍ଞାନ (୨୦୧୬) ଏବଂ କୁନା ପାଇଁ କୁନୀ ପାଇଁ (୨୦୦୭) ଆଦି ଅନ୍ୟତମ ।

ବ୍ୟକ୍ତିଗତ ଜୀବନ

ରବୀନ୍ଦ୍ରନାଥ ୧୯୫୨ ମସିହାରେ ଜନ୍ମଗ୍ରହଣ କରିଥିଲେ । ଖୋର୍ଦ୍ଧା ଜିଲ୍ଲାର ବାରଙ୍ଗ ଅନ୍ତର୍ଗତ କେନ୍ଦୁପାଟଣା ତାଙ୍କର ପୌତୃକ ଗ୍ରାମ । ତାଙ୍କ ପିତାଙ୍କ ନାମ ବାଳକୃଷ୍ଣ ମାଝୀ । ଗାଁ ଚାଟଶାଳୀରେ ତାଙ୍କର ଶିକ୍ଷାରମ୍ଭ ହୋଇଥିଲା । କଟକର ରାଣୀହାଟ ହାଇସ୍କୁଲରୁ ସେ ସ୍କୁଲ ଶିକ୍ଷା ହାସଲ କରିଥିଲେ । ୧୯୬୮ ମସିହାରେ ରାଣୀହାଟ ହାଇସ୍କୁଲରୁ ଉତ୍ତୀର୍ଣ୍ଣ ହେବାପରେ ସେ ରେଭେନ୍ସା ମହାବିଦ୍ୟାଳୟରୁ ସ୍ନାତକ ଓ ସ୍ନାତକୋତ୍ତର ଶିକ୍ଷା ହାସଲ କରିଥିଲେ । ୧୯୭୫ ମସିହାରେ ସେ ଆସିକା ବିଜ୍ଞାନ ମହାବିଦ୍ୟାଳୟରେ ଅଧ୍ୟାପକ ଭାବରେ ଚାକିରୀ ଆରମ୍ଭ କରିଥିଲେ । ପରେ ଓଡ଼ିଶା ରାଜ୍ୟ ଅର୍ଥନିଗମରେ ଚାକିରୀ କରି, ୨୦୧୦ ମସିହାରେ ଅବସର ଗ୍ରହଣ କରିଥିଲେ ।

ସାହିତ୍ୟ ସର୍ଜନା

ପିଲାବେଳୁ ରବୀନ୍ଦ୍ରନାଥଙ୍କ ପିତା ତାଙ୍କପାଇଁ ଟୁଆଁଟୁଇଁ ଓ ଜହ୍ନମାମୁଁ ଆଦି ପତ୍ରିକା ଆଣିଦେଉଥିଲେ । ସେଗୁଡ଼ିକୁ ପଢ଼ି, ତାଙ୍କର ସାହିତ୍ୟପ୍ରତି ଆଗ୍ରହ ବଢ଼ିଥିଲା । ସ୍କୁଲ ପତ୍ରିକାରେ ଜ୍ୟୋତିରେ ତାଙ୍କ ଲିଖିତ ଏକ କବିତା ପ୍ରକାଶ ପାଇବା ତାଙ୍କପାଇଁ ଅନେକ ଖୁସି ଆଣି ଦେଇଥିଲା । ପରେ, ସେହି ପତ୍ରିକାର ସମ୍ପାଦନା ଦାୟିତ୍ୱ ସେ ନେଇଥିଲେ ।

ଶିଶୁଲେଖା ପତ୍ରିକା ନିମନ୍ତେ ସେ ନିୟମିତ ଭାବରେ ଲେଖୁଥିଲେ । ଏଥିନିମନ୍ତେ ପତ୍ରିକାରେ ସମ୍ପାଦକ ଅନନ୍ତ ପଟ୍ଟନାୟକ ତାଙ୍କର ଉତ୍ସାହ ବର୍ଦ୍ଧନ କରିଥିଲେ ଓ ତାଙ୍କୁ ଶିଶୁମାନଙ୍କ ନିମନ୍ତେ ବିଜ୍ଞାନ ଭିତ୍ତିକ ସାହିତ୍ୟ ଲେଖିବା ନିମନ୍ତେ ପ୍ରବର୍ତ୍ତାଇଥିଲେ ।

ରଚନାବଳୀ

ପିଲାଙ୍କପାଇଁ ରବୀନ୍ଦ୍ରନାଥ ୭ଟି କବିତା, ୮ଟି ଗଳ୍ପ, ୩ଟି ଉପନ୍ୟାସ, ୫ଟି ଅନୁବାଦ ଓ ୧୫ଟି ବିଜ୍ଞାନ ଭିତ୍ତିକ ପୁସ୍ତକ ରଚନା କରିଛନ୍ତି ।

• ଗାଁ ସରଗ
• ପରିବେଶ କାହାଣୀ
• ଶିଶୁ ଉପନ୍ୟାସ କଥାବସ୍ତୁ
• ଅଳ୍ପ ଅଳ୍ପ ବିଜ୍ଞାନ ଗଳ୍ପ
• ପଢ଼ି ଶିଖ ଗଢ଼ି ଶିଖ
• କୁନା ପାଇଁ କୁନୀ ପାଇଁ (୨୦୦୭)
• ନୀଳ ଠେକୁଆ
• ଗୀତରେ ଗୀତରେ ବିଜ୍ଞାନ (୨୦୧୬)
• ଡାଇନୋସରର ଡାଏରୀ

ସମ୍ମାନ ଓ ପୁରସ୍କାର

• ରବୀନ୍ଦ୍ରନାଥ ମାଝୀ ତାଙ୍କର ନୀଳ ଠେକୁଆ ପୁସ୍ତକ ପାଇଁ ୨୦୧୩ ମସିହାରେ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାରରେ ସମ୍ମାନୀତ ହୋଇଥିଲେ ।
• ଏନସିଆରଟି ଜାତୀୟ ପୁରସ୍କାର
• ପ୍ରାଣକୃଷ୍ଣ ପରିଜା ଲୋକପ୍ରିୟ ବିଜ୍ଞାନ ପୁସ୍ତକ ପୁରସ୍କାର
• ରାମକୃଷ୍ଣ ନନ୍ଦ ଶିଶୁସାହିତ୍ୟ ପୁରସ୍କାର
• ଶ୍ରୀକ୍ଷେତ୍ର ଶିଶୁସାହିତ୍ୟ ସମ୍ମାନ