ଅଶ୍ୱିନୀ (ନକ୍ଷତ୍ର)

ଇଂରାଜୀ ଲିଙ୍କ

https://or.wikipedia.org/wiki/Ashvini

ମେଷ ରାଶିରେ ଅଶ୍ୱିନୀ ନକ୍ଷତ୍ରର ସ୍ଥିତି

ହିନ୍ଦୁ ଜ୍ୟୋତିଷ ମତେ ୨୭ଟି ନକ୍ଷତ୍ର ମଧ୍ୟରୁ ପ୍ରଥମ ନକ୍ଷତ୍ର ହେଉଛି ଅଶ୍ୱିନୀ । ରାଶିଚକ୍ରରେ(ଅପମଣ୍ଡଳ) ଏହା ମେଷ ରାଶିର ମୁଣ୍ଡ ଦିଗରେ ଅବସ୍ଥିତ ।

ଜ୍ୟୋତିଷୀୟ ପରିଚୟ

ହିନ୍ଦୁ ଜ୍ୟୋତିଷରେ ରାଶିଚକ୍ର (୩୬୦ ଡିଗ୍ରୀ)କୁ କାଳ୍ପନିକ ୨୭ ଭାଗରେ ବିଭକ୍ତ କରାଯାଇଛି । ପ୍ରତ୍ୟେକ ଭାଗ ଅର୍ଥାତ୍‌ ୧୩ ଡିଗ୍ରୀ ୨୦ ମିନିଟ ଅଂଶ ଗୋଟିଏ ଗୋଟିଏ ନକ୍ଷତ୍ର ନାମରେ ନାମିତ । ନକ୍ଷତ୍ରମାନଙ୍କୁ ହିନ୍ଦୁ ଜ୍ୟୋତିଷମାନେ ୨୭ଟି ସ୍ୱତନ୍ତ୍ର ତାରକାପୁଞ୍ଜରେ ବିଭକ୍ତକରି ପ୍ରତ୍ୟେକଙ୍କୁ ଗୋଟିଏ ଲେଖାଁଏ ସ୍ୱତନ୍ତ୍ର ନାମ ଦେଇ ଅଛନ୍ତି । ପୁଣି ପ୍ରତ୍ୟେକ ନକ୍ଷତ୍ରକୁ ଚାରି ପାଦରେ ବିଭକ୍ତ କରାଯାଇଛି । ଚନ୍ଦ୍ରର ଦୈନିକ ଗତି ପ୍ରାୟ ୧୩ ଡିଗ୍ରୀ ୨୦ ମିନିଟ ହୋଇଥିବାରୁ ଏହା ଗୋଟିଏ ଦିନ ଗୋଟିଏ ନକ୍ଷତ୍ରରେ ଅବସ୍ଥାନ କରିଥାଏ । ତେଣୁ ବୈଦିକ ଜ୍ୟୋତିଷରେ ନକ୍ଷତ୍ର ସହିତ ଚନ୍ଦ୍ରର ସମ୍ବନ୍ଧ ଅତି ନିବିଡ । ବୈଦିକ ଜ୍ୟୋତିଷ ମତରେ ବ୍ୟକ୍ତିର ଜନ୍ମ ସମୟରେ ଚନ୍ଦ୍ର ଯେଉଁ ନକ୍ଷତ୍ରରେ ଅବସ୍ଥାନ କରୁଥାନ୍ତି, ବ୍ୟକ୍ତିର ସେହି ଜନ୍ମ ନକ୍ଷତ୍ର ହୁଏ ।

ତେବେ ଅଶ୍ୱିନୀଠାରୁ ରେବତୀ ପର୍ଯ୍ୟନ୍ତ ୨୭ ନକ୍ଷତ୍ର ମଧ୍ୟରେ ଚାନ୍ଦ୍ରମାନ ମାସକୁ ବାଣ୍ଟିଲା ବେଳକୁ କିଛି ନିଅଣ୍ଟ ଦେଖାଯିବାରୁ ହିନ୍ଦୁ ଜ୍ୟୋତିଷମାନେ ଅଭିଜିତ ନକ୍ଷତ୍ରକୁ ଅଷ୍ଟାବିଂଶ ନକ୍ଷତ୍ର ରୂପେ ଗଣନା କରିଅଛନ୍ତି ।

ବିଶେଷତ୍ୱ

• ହିନ୍ଦୁ ଜ୍ୟୋତିଷ ମତେ ଅଶ୍ୱିନୀ ନକ୍ଷତ୍ର ତିନୋଟି ତାରାର (en:Mesarthim,en:Hamal & en:Al Sharatain) ସମାହାର । ଏହି ତିନୋଟି ତାରା ଏକ ଅଶ୍ୱଭଳି ଦୃଶ୍ୟମାନ ହେଉଥିବାରୁ ନକ୍ଷତ୍ରର ନାମ ଅଶ୍ୱିନୀ ।
• ଅଶ୍ୱିନୀ ନକ୍ଷତ୍ର ରାଶିଚକ୍ରରେ ମେଷ (ରାଶି) ମଧ୍ୟରେ ମୂଳ ବିନ୍ଦୁରୁ(ଶୁନ୍ୟ ଡିଗ୍ରୀ, ଶୁନ୍ୟ ମିନିଟ, ଶୁନ୍ୟ ସେକେଣ୍ଡ) ୧୩ ଡିଗ୍ରୀ ୨୦ ମିନିଟ ପର୍ଯ୍ୟନ୍ତ ବ୍ୟାପ୍ତ ।
• କେତୁ ଏହାର ଅଧିପତି ।
• ଏକ ଚାନ୍ଦ୍ର ମାସର ପୂର୍ଣ୍ଣିମା ତିଥିରେ ଚନ୍ଦ୍ର ଯେଉଁ ନକ୍ଷତ୍ର ଦେଇ ଚଳନ କରନ୍ତି, ସେହି ମାସଟି ଉକ୍ତ ନକ୍ଷତ୍ର ନାମରେ ନାମିତ । ଉଦାହରଣ ସ୍ୱରୂପ, ଆଶ୍ୱିନ ମାସରେ ପୂର୍ଣ୍ଣିମା ତିଥିରେ ଚନ୍ଦ୍ର ଅଶ୍ୱିନୀ ନକ୍ଷତ୍ରରେ ଅବସ୍ଥାନ କରିଥାନ୍ତି ।
• ବୈଦିକ ଜ୍ୟୋତିଷମତେ ଏହି ନକ୍ଷତ୍ର ଦେବଗଣ ଓ ରଜ ଗୁଣ ସହ ସମ୍ବନ୍ଧିତ ।
• ବୈଦିକ ଜ୍ୟୋତିଷ ମତେ ଅଶ୍ୱିନୀ ନକ୍ଷତ୍ର ଲିଙ୍ଗ ଭେଦରେ ପୁରୁଷ ଏବଂ ଜାତିଭେଦରେ ବୈଶ୍ୟ ।
• ଅଶ୍ୱିନୀ ନକ୍ଷତ୍ରରେ ଜନ୍ମିତ ବ୍ୟକ୍ତିବିଶେଷ କର୍ମଠ, ଦୃଢମନା, ଜ୍ଞାନୀ ତଥା ସମସ୍ତଙ୍କଦ୍ୱାରା ଆଦୃତ ହୋଇଥାଆନ୍ତି ।
• ସାଧାରଣତଃ ବୈଦିକ ଜ୍ୟୋତିଷ ମତେ ହିନ୍ଦୁ ପରିବାରରେ ନବଜାତ ଶିଶୁର ଜନ୍ମ ବେଳେ ନିର୍ଦ୍ଦିଷ୍ଟ ନକ୍ଷତ୍ରରେ ଚନ୍ଦ୍ରର ଅବସ୍ଥାନକୁ ନେଇ ନବଜାତକର ନାମକରଣ କରାଯିବାର ପ୍ରଥା ପ୍ରଚଳିତ । ଅଶ୍ୱିନୀ ନକ୍ଷତ୍ରରେ ଚନ୍ଦ୍ର ଅବସ୍ଥାନ କରୁଥିଲେ, ଚାରିପାଦ କ୍ରମରେ ନବଜାତକର ନାମର ପ୍ରଥମ ଅକ୍ଷର ନିମ୍ନପ୍ରକାରେ ହେବ ।

ପ୍ରଥମ ପାଦ-Chu (चू),

ଦ୍ୱିତୀୟ ପାଦ-Che (चे),

ତୃତୀୟ ପାଦ- Cho (चो) ଏବଂ

ଚତୁର୍ଥ ପାଦ- La (ला) ।

ଅଧିକ ତଥ୍ୟ

• "List of Naxatras"