ନୀଳାଦ୍ରି ବିଜୟ (ଉପନ୍ୟାସ)
| ନୀଳାଦ୍ରି ବିଜୟ | |
|---|---|
| ଲେଖକ | ସୁରେନ୍ଦ୍ର ମହାନ୍ତି |
| ଦେଶ | ଭାରତ (ଓଡ଼ିଶା) |
| ଭାଷା | ଓଡ଼ିଆ |
| ଧାରାବାହିକ | ଦ୍ୱିତୀୟ ( ପ୍ରଥମଟି ହେଲା ନୀଳଶୈଳ ) |
| ବିଭାଗ | ଉପନ୍ୟାସ ଓ ଐତିହାସିକ ଉପନ୍ୟାସ |
| ପ୍ରକାଶକ | କଟକ ଷ୍ଟୁଡେଣ୍ଟସ୍ ଷ୍ଟୋର ବାଲୁବଜାର , କଟକ |
| ପ୍ରକାଶ ତାରିଖ | ୧୯୮୦, ୧୯୮୩, ୧୯୮୮, ୧୯୯୮ |
| ମାଧ୍ୟମ ପ୍ରକାର | ଛପାବହି, ବନ୍ଧେଇ ଓ କାଗଜ ମଲାଟ |
| ପୃଷ୍ଠା | ୧୯୨ |
ନୀଳାଦ୍ରି ବିଜୟ , ପ୍ରଖ୍ୟାତ ଓଡ଼ିଆ ଉପନ୍ୟାସ ନୀଳଶୈଳର ଦ୍ୱିତୀୟ ଭାଗ ଅଟେ । କଥାକାର ସୁରେନ୍ଦ୍ର ମହାନ୍ତି[୧] ଏହି ଉପନ୍ୟାସର ରଚନା ନିମନ୍ତେ ଜଗନ୍ନାଥ ସଂସ୍କୃତି ଉପରେ ବହୁତ ଗବେଷଣା କରିଥିଲେ । ଲେଖକ ନିଜର ଜଣେ ବନ୍ଧୁଙ୍କ ଅନୁରୋଧ କ୍ରମେ ଦ୍ୱିତୀୟ ଭାଗର ଲେଖା ଆରମ୍ଭ କରିଥିଲେ । [୨]
ପୁସ୍ତକ ସମୀକ୍ଷା[ସମ୍ପାଦନା]
ନୀଳଶୈଳ ଉପନ୍ୟାସରେ , ତକି ଖାଁ ଆକ୍ରମଣରୁ ଜଗନ୍ନାଥଙ୍କୁ ରକ୍ଷା କରିବା ପାଇଁ ରାଜା ରାମଚନ୍ଦ୍ର ଦେବ , ତିନି ଜୀଉଙ୍କୁ ଚିଲିକା ମଧ୍ୟସ୍ଥ ଗୁରୁବାଇ ଦ୍ୱୀପକୁ ନେଇଯାଇଥିଲେ । ସେହି ନୀଳ ମରୁଭୂମି ମଧ୍ୟରେ ହିଁ , ପାଠକଙ୍କୁ ଏକ ସୀମାହୀନ ଉନ୍ମାଦନାରେ ଭସାଇ ନୀଳଶୈଳ ଉପନ୍ୟାସ ଶେଷ ହୋଇଥିଲା । ନୀଳାଦ୍ରି ବିଜୟରେ ମୁଖ୍ୟତଃ ଜଗନ୍ନାଥଙ୍କ ବଡ଼ ଦେଉଳକୁ ପ୍ରତ୍ୟାବର୍ତ୍ତନ କଥା ଲେଖାଯାଇଛି । ସେହି ସମୟର ଓଡ଼ିଶାର ଗ୍ରାମ୍ୟ ଜୀବନର ଏକ ସୁନ୍ଦର ଚିତ୍ର ଓ ଜଗନ୍ନାଥଙ୍କୁ ନେଇ ସାଧାରଣ ଲୋକଙ୍କ ଚିନ୍ତାଧାରା ସୁନ୍ଦର ଭାବରେ ବର୍ଣ୍ଣନା କରାଯାଇଛି । ତକି ଖାଁ ଓ ଅମିନ ଚାନ୍ଦର ସମସ୍ତ ଚକ୍ରାନ୍ତକୁ ପଣ୍ଡ କରି , ଓଡ଼ିଶାର ବହୁତ ସାମନ୍ତ ରାଜା ଓ ଜମିଦାରମାନଙ୍କ ଏକତ୍ର କରିବାରେ ରାମଚନ୍ଦ୍ର ଦେବ ସଫଳ ହୋଇଛନ୍ତି । କେତେକ ଜମିଦାର ଓ ଖୋଦ ଭାଗିରଥ କୁମାରଙ୍କ ଅସହଯୋଗ ସତ୍ତ୍ୱେ ଜଗନ୍ନାଥଙ୍କୁ ଫେରେଇ ଆଣିବାରେ ସଫଳ ହୋଇଛନ୍ତି । ଜଗନ୍ନାଥ ଫେରୁଥିବା ବେଳେ ସାଧାରଣ ଜନସାଧାରଣଙ୍କ ଆପ୍ରାଣ ସହଯୋଗ ଓ ଶେଷରେ ଯୁଦ୍ଧ ସମୟରେ ରାଜା ରାମଚନ୍ଦ୍ର ଦେବ ଓରଫ ହାଫିଜ କାଦରଙ୍କ ପତ୍ନୀ ରେଜିଆଙ୍କ ସହାୟତା ବଳରେ ଏହା ସମ୍ଭବ ହୋଇପାରିଛି । ଏହି ଉପନ୍ୟାସ ଶେଷ ଭାଗରେ ଲେଖକ କିଛି ସାମାଜିକ ପ୍ରଥାର ବିରୋଧ କରିଛନ୍ତି । ଜଗନ୍ନାଥଙ୍କ ପ୍ରତି ପୂର୍ଣ୍ଣ ରୂପେ ସମର୍ପିତ ରିଜିଆଙ୍କୁ ଜଗନ୍ନାଥ ମନ୍ଦିରରେ ପ୍ରବେଶ ସମୟରେ ପଣ୍ଡାଙ୍କର ବିରୋଧକୁ, ରାମଚନ୍ଦ୍ର ଦେବଙ୍କ ରୂପେ ଲେଖକ ଏକ ବିଡମ୍ବନା ବୋଲି ଚିତ୍ରଣ କରିଛନ୍ତି । ରିଜିଆ ଛାଡି ଯାଇଥିବା ନୀଳ-ଇନ୍ଦ୍ରମଣି ବସା ମୁଦ୍ରିକାର ଅଧିକାର ପାଇଁ ପଣ୍ଡାଙ୍କ ବଚସାକୁ ଦେଖି , ଲେଖକ ଦୁଃଖ ପ୍ରକାଶ କରିଛନ୍ତି ।
ଅନେକଙ୍କ ମତରେ କାହାଣୀ ଓ ଚରିତ୍ରର କ୍ରମିକତା ବ୍ୟତୀତ ଏହି ଉପନ୍ୟାସରେ ନୀଳଶୈଳ ଭଳି ମନାଛୁଆଁ ଆବେଗ ନାହିଁ ।[୩] ଏହି ଉପନ୍ୟାସଟି ପାଠକଙ୍କ ନିକଟରେ ନୀଳଶୈଳ ଭଳି ଆଦୃତ ହୋଇପାରି ନାହିଁ ।
ଅଧିକ ଦେଖନ୍ତୁ[ସମ୍ପାଦନା]
- ନୀଳଶୈଳ ଓ ନୀଳାଦ୍ରି ବିଜୟର ତୁଳନା
- ନୀଳଶୈଳ (ଉପନ୍ୟାସ)
- ମାଦଳା ପାଞ୍ଜି
- ଜଗନ୍ନାଥ ମନ୍ଦିରର ଇତିହାସ
- ଜଗନ୍ନାଥ ମନ୍ଦିର
- ଜଗନ୍ନାଥଙ୍କ ଦେବନୀତି
ଆଧାର[ସମ୍ପାଦନା]
- ↑ Sisir Kumar Das (1991). History of Indian Literature: 1911-1956, struggle for freedom : triumph and tragedy. Sahitya Akademi. pp. 547–. ISBN 978-81-7201-798-9.
- ↑ ନୀଳାଦ୍ରି ବିଜୟ , ପ୍ରକାଶକଙ୍କ ବାର୍ତ୍ତା/ଉପକ୍ରମ
- ↑ ନୀଳାଦ୍ରି ବିଜୟ ଓ ନୀଳଶୈଳ ମଧ୍ୟରେ ତୁଳନା