ଓଡ଼ିଆ ଉଇକିପିଡ଼ିଆ ବର୍ତ୍ତମାନ ୧୬ ହଜାର ପ୍ରସଙ୍ଗରେ ପହଞ୍ଚିବାକୁ ଯାଉଛି । ଯଦିଓ ଇଏ ଖୁସିର ବିଷୟ ମୁଁ ଭାବୁଛି ଏ ଆମ ପାଇଁ ସ୍ୱ-ବିଶ୍ଳେଷଣ କରିବାର ମଧ୍ୟ ସମୟ । ମୁଁ କେବଳ ନିମ୍ନମାନର ପ୍ରସଙ୍ଗ ଓ ତା'ର ପୃଷ୍ଠଭୂମି ଜାଣିବାକୁ ଚେଷ୍ଟା କରୁଥିଲି । ଯାହା ଜଣାଯାଉଛି ଆମକୁ ୧୬ ହଜାର ପ୍ରସଙ୍ଗର ଖୁସି ପାଳନ କରିବା ଆଗରୁ ପାଖାପାଖି ୪ ହଜାର ନିମ୍ନମାନର ପ୍ରସଙ୍ଗ କଥା ଭାବିବାକୁ ପଡ଼ିବ । ତେବେ ଏ ୪ ହଜାର ଭିତରୁ ୬୦୦ ପାଖାପାଖି ଉଇକିଆଳିଙ୍କ ତିଆରି ଓ ସେସବୁର ମାନ ଉନ୍ନତ କରିବା ସମୟସାପେକ୍ଷ ହେଲେ ହେଁ ସମ୍ଭବ । ବାକି ୩,୬୦୦ ଖଣ୍ଡେ ବଟଦ୍ୱାରା ୨୦୧୪-୨୦୧୫ ମସିହାରେ ତିଆରି । ଏଥି ଭିତରୁ ୧,୨୫୬ କେବଳ ଡାଇନୋସର ବାବଦରେ ଆଉ ଥରୁଟିଏ ମଧ୍ୟ କୌଣସି ଅଣ-ବଟ ଉଇକିଆଳିଙ୍କଦ୍ୱାରା ସମ୍ପାଦନା କରାଯାଇନାହିଁ । ଯଦି ୬ ବର୍ଷ ଭିତରେ ପ୍ରସଙ୍ଗଟିଏ ଜଣେ ଉଇକିଆଳିଙ୍କ ଦ୍ୱାରା ସମ୍ପାଦନା ହୋଇନାହିଁ ଆଉ ପୂରା ପ୍ରସଙ୍ଗରେ କେବଳ ୪ଟି ଛାଞ୍ଚ ଭଳି ବାକ୍ୟ (୧୦୦ ଶବ୍ଦରୁ ମଧ୍ୟ କମ) ରହିଛି ମୋ ମତରେ ସେ ପ୍ରସଙ୍ଗ ରଖିବାର କୌଣସି କାରଣ ନାହିଁ । ଉଇକିପିଡ଼ିଆର ମୂଳ ଉଦ୍ଦେଶ୍ୟ ଲୋକଙ୍କ ପାଇଁ ତାଙ୍କ ଭାଷାରେ ଜ୍ଞାନ ବିତରଣ କରିବା । ପ୍ରସଙ୍ଗ ସଂଖ୍ୟା ନାଁକୁ ମାତ୍ର ବଢ଼ାଇବା ନୁହେଁ । ତେବେ ତଥ୍ୟ ଉପଲବ୍ଧ ନ ଥିଲେ ଅଧାଗଢ଼ା ପ୍ରସଙ୍ଗ କରିବାରେ ଅସୁବିଧା ନାହିଁ । ଆମ କମୁନିଟି ଏବେ ଛୋଟ । ତେଣୁ ନୂଆ ଉଇକିଆଳିଙ୍କ ଦ୍ୱାରା ଲେଖା ଆଉ ଆଗରୁ ଥିବା ଅଣ-ବଟତିଆରି ନିମ୍ନମାନର ଲେଖାର ମାନ ଉନ୍ନତ କରିବା ମଧ୍ୟ ଅତି ସମୟ ସାପେକ୍ଷ । ତା' ଉପରେ ବଟତିଆରି ଲେଖା ସୁଧାରିବା ବୋଝ ଉପରେ ନଳିତା ବିଡ଼ା ଭଳି । ମୁଁ ଥରେ ଦୁଇଥର ଡାଇନୋସର ଲେଖା ଗୋଟେ ଯୋଡ଼େ ସୁଧାରିବାକୁ ଯାଇ ଅସଫଳ ହୋଇଛି କାରଣ ଡାଇନୋସର ସମ୍ବନ୍ଧିତ ଶବ୍ଦାବଳୀ ଓଡ଼ିଆରେ ନାହିଁ । ଇଂରାଜୀରୁ ଅକ୍ଷରାନ୍ତର କରିବା କଷ୍ଟ । ଏ ବିଷୟରେ କାହାର ନିହାତି ଆଗ୍ରହ ନ ଥିଲେ ଜଣେ କରିବ ନାହିଁ ।
ତେଣୁ ଡାଇନୋସର ସମ୍ବନ୍ଧିତ ସବୁ ଅଧାଗଢ଼ା ପ୍ରସଙ୍ଗ ଲିଭାଇବା ପାଇଁ ମୁଁ ସମସ୍ତଙ୍କ ମତ ଲୋଡ଼ୁଛି । ଦୟାକରି ତଳେ ନିଜ ନିଜର ମତ ଦେବେ । ଯଦି କୌଣସି କାରଣରୁ ନ ଲିଭେଇ ଅନ୍ୟ କୌଣସି ବାଟରେ ପ୍ରସଙ୍ଗ ଉନ୍ନତ କରିବା କଥା ଭାବୁଛନ୍ତି ତାହେଲେ ତାହା ମଧ୍ୟ ଜଣାଇବେ । ସହମତ, ବିରୋଧ, ଭିନ୍ନମତ ସବୁପ୍ରକାର ମତକୁ ସ୍ୱାଗତ । ଏସବୁକୁ ଭିତ୍ତି କରି ଆଜିଠୁ ମାସେ ପରେ (ଅକ୍ଟୋବର ୧୦ ତାରିଖ) କୌଣସି ସିଦ୍ଧାନ୍ତ ନିଆଯିବ ।
