ପ୍ରେମାନନ୍ଦ ମହାପାତ୍ର

ପ୍ରେମାନନ୍ଦ ମହାପାତ୍ର
ଜନ୍ମ ଓ ଜନ୍ମସ୍ଥାନ	୧୯୬୧ ଚାନ୍ଦପାଳ, ନୟାଗଡ଼
ବୃତ୍ତି	ଅଧ୍ୟାପକ,କଥାକାର ଏବଂ ଗବେଷକ
ଭାଷା	ଓଡ଼ିଆ, ଇଂରାଜୀ
ଜାତୀୟତା	ଭାରତୀୟ
ସାହିତ୍ୟ କୃତି	ମନସ୍ୱୀ ସାଧକ: ପଣ୍ଡିତ ବିନାୟକ ମିଶ୍ର, ଓଡ଼ିଆ ସାହିତ୍ୟର ଇତିହାସ
ପୁରସ୍କାର	ଓଡ଼ିଆ ସାହିତ୍ୟ ଏକାଡେମୀ ପୁରସ୍କାର (୨୦୦୯)

ପ୍ରେମାନନ୍ଦ ମହାପାତ୍ର (ଜନ୍ମ: ୧୯୬୧) ଜଣେ ଭାରତୀୟ ଓଡ଼ିଆ-ଭାଷୀ ସମାଲୋଚକ, ପ୍ରାବନ୍ଧିକ, ଗବେଷକ ତଥା ସଂକଳକ । ସେ ୨୦୦୯ ମସିହାରେ ମନସ୍ୱୀ ସାଧକ: ପଣ୍ଡିତ ବିନାୟକ ମିଶ୍ର ପାଇଁ ପ୍ରବନ୍ଧ ଓ ସମାଲୋଚନା ବିଭାଗରେ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର ପାଇଥିଲେ ।

ସଂକ୍ଷିପ୍ତ ଜୀବନୀ

ପ୍ରେମାନନ୍ଦ ମହାପାତ୍ର ନୟାଗଡ଼ ଜିଲ୍ଲାରେ ଜନ୍ମଗ୍ରହଣ କରିଥିଲେ । ସେ ଓଡ଼ିଆ ସାହିତ୍ୟକୁ ନୟାଗଡ଼ ଜିଲ୍ଲାର ଅବଦାନ ଶୀର୍ଷକ ନିବନ୍ଧ ଉପସ୍ଥାପନ କରି ଉତ୍କଳ ବିଶ୍ୱବିଦ୍ୟାଳୟରୁ ପିଏଚ୍ ଡି ଡିଗ୍ରୀ ଲାଭ କରିଥିଲେ । ଓଡ଼ିଶା ସରକାରଙ୍କ ଉଚ୍ଚ ଶିକ୍ଷା ବିଭାଗ ଅଧିନରେ ବିକ୍ରମଦେବ କଲେଜ-ଜୟପୁର, ସରକାରୀ ମହାବିଦ୍ୟାଳୟ - ଭବାନୀପାଟଣା, ସରକାରୀ ମହିଳା ମହାବିଦ୍ୟାଳୟ - ଫୁଲବାଣୀ, ବିଜେବି ସ୍ୱୟଂଶାସିତ ମହାବିଦ୍ୟାଳୟ - ଭୁବନେଶ୍ୱର, ରେଭେନସା ବିଶ୍ୱବିଦ୍ୟାଳୟ - କଟକର ଓଡ଼ିଆ ବିଭାଗରେ ପ୍ରାଧ୍ୟାପକ ଓ ବିଭାଗୀୟ ମୁଖ୍ୟ ଭାବେ କାର୍ଯ୍ୟ କରିଥିଲେ । ଏହା ବ୍ୟତୀତ ସେ ଅନୁଗୋଳ ସରକାରୀ ସ୍ୱୟଂଶାସିତ ମହାବିଦ୍ୟାଳୟ ସ୍ନାତକୋତ୍ତର ଓଡ଼ିଆ ବିଭାଗରେ ଆସୋସିଏଟ ପ୍ରଫେସର ଓ ବିଭାଗୀୟ ମୁଖ୍ୟ ଭାବେ ମଧ୍ୟ କାର୍ଯ୍ୟରତ ଥିଲେ । ଓଡ଼ିଆ ସମାଲୋଚନା ସାହିତ୍ୟକୁ ତାଙ୍କ ଦାନ ଅତୁଳନୀୟ । ତାଙ୍କ ଅଧିନରେ ଅନେକ ଛାତ୍ରଛାତ୍ରୀ ଉପାଧ୍ୟୁତ୍ତର ଗବେଷଣା ମଧ୍ୟ କରିଛନ୍ତି ।ସେ କବିସମ୍ରାଟ ଉପେନ୍ଦ୍ର ଭଞ୍ଜଙ୍କ ନୀଳାଦ୍ରୀଶ ଚଉତିଶା, କବି ଯଦୁମଣିଙ୍କ ପ୍ରବନ୍ଧ ପୂର୍ଣ୍ଣଚନ୍ଦ୍ର, ବ୍ୟାସକବି ଫକୀର ମୋହନଙ୍କ ଛ'ମାଣ ଆଠଗୁଣ୍ଠ, ମାମୁ, ଲଛମା, ପ୍ରାୟଶ୍ଚିତ ଆଦିର ସମ୍ପାଦନା କରିଛନ୍ତି ।

ରଚନାବଳୀ

• ମନସ୍ୱୀ ସାଧକ: ପଣ୍ଡିତ ବିନାୟକ ମିଶ୍ର
• ଓଡ଼ିଆ ସାହିତ୍ୟର ଇତିହାସ
• ଉପେନ୍ଦ୍ର ଭଞ୍ଜ ଓ ସାରସ୍ୱତ ପୀଠ : ମାଳିସାହି
• କାଳଜୟୀ ପ୍ରତିଭା କବିସମ୍ରାଟ ଉପେନ୍ଦ୍ର ଭଞ୍ଜ
• ନୟାଗଡ଼ ଜିଲ୍ଲାର କଥିତ ଭାଷା : ଏକ ସର୍ବେକ୍ଷଣ
• କହେ ଟାଡ଼ିସରୁ ବାଇ
• ଓଡ଼ିଶାର କଥିତ ଭାଷା ପରିକ୍ରମା
• ଭଞ୍ଜୀୟ ଅଳଙ୍କାର ମାନସ
• ଓଡ଼ିଆ ସାରସ୍ୱତ ସ୍ତବକ
• ନୟାଗଡ଼ ବଘେଲ ରାଜବଂଶର ସାରସ୍ୱତ ସୌରଭ
• ଓଡ଼ିଆ କାବ୍ୟ କବିତା ପ୍ରାଚୀନରୁ ସାମ୍ପ୍ରତିକ
• ଓଡ଼ିଶାର ଭାଷା ବିଭବ ୧ମ
• କୋଟିକୈବଲ୍ୟନାଥ ମହାପ୍ରଭୁ ଶ୍ରୀଜଗନ୍ନାଥ
• ସୃଜନ ମାଟିର ସାରସ୍ୱତ ସ୍ଥପତି
• ବିଦ୍ୟାନଗରୀର ମହାନ ସାଧକ : ସାମନ୍ତ ଚନ୍ଦ୍ରଶେଖର
• ଶ୍ରୀଗୀତଗୋବିନ୍ଦ ଓ ମହାକବି ଶ୍ରୀଜୟଦେବ (ସମ୍ପାଦନା ଓ ଆଲୋଚନା)
• ଅନନ୍ୟ ମହାକାବ୍ୟ ଶ୍ରୀଗୀତଗୋବିନ୍ଦ (ସମ୍ପାଦନା ଓ ଆଲୋଚନା)
• ଶତାବ୍ଦୀର ବିସ୍ମୟ ବାରିଷ୍ଟର ମଧୁସୂଦନ ଦାସ
• ଓଡ଼ିଶାର ଗର୍ବ ଓ ଗୌରବ : ମହୀୟାନ ମଧୁବାବୁ
• ଭାଷା ଓ ଭାଷାବିଜ୍ଞାନ

ସମ୍ମାନ ଓ ପୁରସ୍କାର

• ୨୦୦୯: ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର (ପ୍ରବନ୍ଧ ଓ ସମାଲୋଚନା)