ବାମା (ଲେଖିକା)

ବାମା (ଜନ୍ମ ୧୯୫୮), ବାମା ଫାଉଷ୍ଟିନା ସୁସାଇରାଜ ଭାବରେ ମଧ୍ୟ ଜଣାଶୁଣା, ଜଣେ ତାମିଲ ଦଳିତ ନାରୀବାଦୀ, ଶିକ୍ଷିକା ଏବଂ ଔପନ୍ୟାସିକା । ସେ ତାମିଲନାଡୁରେ ଦଳିତ ଖ୍ରୀଷ୍ଟିଆନ ମହିଳାମାନଙ୍କଦ୍ୱାରା ଅନୁଭୂତ ଆନନ୍ଦ ଏବଂ ଦୁଃଖ ବର୍ଣ୍ଣିତ ତାଙ୍କର ଆତ୍ମଜୀବନୀ ଉପନ୍ୟାସ କାରୁକ୍କୁ (୧୯୯୨) ପାଇଁ ଖ୍ୟାତି ଅର୍ଜନ କରିଥିଲେ । ପରବର୍ତ୍ତୀ ସମୟରେ ସେ ଆଉ ଦୁଇଟି ଉପନ୍ୟାସ ସଙ୍ଗତି (୧୯୯୪) ଏବଂ ବନ୍ମମ୍ (୨୦୦୨) ତଥା ଦୁଇଟି କ୍ଷୁଦ୍ରଗଳ୍ପ ସଂକଳନ ଲେଖିଥିଲେ: କୁସୁମ୍ବୁକରନ (୧୯୯୬) ଏବଂ ଓରୁ ତତ୍ତ୍ୱମ୍ ଏରୁମୈୟମ୍ (୨୦୦୩) । ଏହା ବ୍ୟତୀତ ସେ କୋଡ଼ିଏଟି କ୍ଷୁଦ୍ର କାହାଣୀ ମଧ୍ୟ ଲେଖିଛନ୍ତି ।

ଜୀବନୀ

ପ୍ରାରମ୍ଭିକ ଜୀବନ

ବାମା ୧୯୫୮ ମସିହାରେ ତତ୍କାଳୀନ ମାଡ୍ରାସ ରାଜ୍ୟର ପୁଥୁପାଟିର ପରାଇୟାର ସମ୍ପ୍ରଦାୟର ଏକ ରୋମାନ କ୍ୟାଥୋଲିକ୍ ପରିବାରରେ ଫାଉଷ୍ଟିନା ମେରି ଫାତିମା ରାଣୀ ନାମରେ ଜନ୍ମ ଗ୍ରହଣ କରିଥିଲେ । ପରେ ସେ ନିଜ ଲେଖନୀ ନାମ "ବାମା" ରଖିଥିଲେ । ତାଙ୍କ ପିତା ସୁସାଇରାଜ ଭାରତୀୟ ସେନାରେ ନିୟୋଜିତ ଥିଲେ । ତାଙ୍କ ମାଆଙ୍କ ନାମ ଥିଲା ସେବସ୍ତୀଆମ୍ମା । ସେ ପ୍ରସିଦ୍ଧ ଦଳିତ ଲେଖକ ରାଜ ଗୌତମନଙ୍କ ଭଉଣୀ । ବାମାଙ୍କ ଜେଜେବାପା ହିନ୍ଦୁ ଧର୍ମରୁ ଖ୍ରୀଷ୍ଟିଆନ ଧର୍ମକୁ ଧର୍ମାନ୍ତରିତ ହୋଇଥିଲେ । ବାମାଙ୍କ ପୂର୍ବପିଢ଼ି ଦଳିତ ସମ୍ପ୍ରଦାୟର ଥିଲେ ଏବଂ କୃଷି ଶ୍ରମିକ ଭାବରେ କାର୍ଯ୍ୟ କରୁଥିଲେ । ବାମା ତାଙ୍କ ଗାଁରେ ନିଜର ପ୍ରାରମ୍ଭିକ ଶିକ୍ଷାଗ୍ରହଣ କରିଥିଲେ । ତାଙ୍କର ପ୍ରାରମ୍ଭିକ ସାହିତ୍ୟିକ ପ୍ରଭାବ ମଧ୍ୟରେ ଜୟକାନ୍ତନ, ଅଖିଳନ, ମଣି ଏବଂ ପାର୍ଥସାରଥୀ ଆଦି ତାମିଲ ଲେଖକମାନେ ଅନ୍ତର୍ଭୁକ୍ତ । କଲେଜରେ ସେ ଖାଲିଲ ଜିବ୍ରାନ ଏବଂ ରବୀନ୍ଦ୍ରନାଥ ଠାକୁରଙ୍କ ଲେଖା ପଢ଼ୁଥିଲେ । ସ୍ନାତକୋତ୍ତର ପରେ ସେ ଅନେକ ଗରିବ ଝିଅଙ୍କୁ ଜଣେ ସ୍କୁଲ ଶିକ୍ଷକ ଭାବେ ପଢ଼ାଉଥିଲେ । ପରେ ସେ ସାତ ବର୍ଷ ଧରି ଜଣେ ନନ୍ ଭାବରେ କାର୍ଯ୍ୟ କରିଥିଲେ । ସେ ଜାତିଭିତ୍ତିକ ଭେଦଭାବରୁ ରକ୍ଷା ପାଇବା ପାଇଁ ଧର୍ମଗତ କାମରେ ଭାଗନେବା ସହ ଗରିବ ଦଳିତ ଝିଅମାନଙ୍କ ଅଗ୍ରଗତିରେ ସାହାଯ୍ୟ କରିବାର ଅଭିଯାନକୁ ଆଗକୁ ବଢ଼ାଇବା ପାଇଁ କାର୍ଯ୍ୟ କରିଛନ୍ତି ।

ରଚନାବଳୀ

• କାରୁକ୍କୁ (୧୯୯୨; ୨୦୧୨ରେ ଦ୍ୱିତୀୟ ସଂସ୍କରଣ)
• ସଙ୍ଗତି (୧୯୯୪)
• କୁସୁମ୍ବୁକରନ (୧୯୯୬)
• ବନ୍ମମ୍ (୨୦୦୨)
• ଓରୁ ତତ୍ତ୍ୱମ୍ ଏରୁମୈୟମ୍ (୨୦୦୩)
• ଜଷ୍ଟ ୱାନ ୱାର୍ଡ଼ (୨୦୧୮; ମାଳିନୀ ସେଶାଦ୍ରୀଙ୍କଦ୍ୱାରା ଅନୂଦିତ)