୧୩ (ସଂଖ୍ୟା)

ଇଂରାଜୀ ଲିଙ୍କ

https://or.wikipedia.org/wiki/13_(number)

ତେର (୧୩) ହେଉଛି ସାଧାରଣ ଗଣନ ସଂଖ୍ୟା ଶ୍ରେଣୀର ତ୍ରୟୋଦଶ ତଥା ୧୨ ଓ ୧୪ର ମଧ୍ୟବର୍ତ୍ତୀ ଏକ ପ୍ରାକୃତିକ ସଂଖ୍ୟା ।

ଗାଣିତିକ ଧର୍ମ

• ୧୩ ହେଉଛି ଷଷ୍ଠ ମୌଳିକ ସଂଖ୍ୟା ।
• ପିଥାଗୋରୀୟ ତ୍ରୟୀରେ ୫, ୧୨ ସହ ୧୩ ହେଉଛି ବୃହତ୍ତମ ସଂଖ୍ୟା ।(ଯେହେତୁ ୫^୨+୧୨^୨=୧୩^୨)
• ମାତ୍ର ୩ ଗୋଟି ୱିଲସନ-ମୌଳିକ ମଧ୍ୟରୁ ୧୩ ଅନ୍ୟତମ ।

ଅଙ୍କ ଜ୍ୟୋତିଷରେ ମହତ୍ତ୍ୱ

• ଅଙ୍କ ଜ୍ୟୋତିଷ ଅନୁସାରେ ୧୩ର ଅଶୁଭତ୍ୱ ଏକ ଅନ୍ଧବିଶ୍ୱାସ । ୧୩(୧+୩=୪) ତାରିଖରେ ଜନ୍ମିତ ବ୍ୟକ୍ତିବିଶେଷ ୪ସଂଖ୍ୟାଦ୍ୱାରା ପ୍ରଭାବିତ ହୋଇଥାନ୍ତି । ଏମାନେ ସାଧାରଣତଃ ବହୁଜନ-ବିଶ୍ୱାସ ମାର୍ଗରେ ନ ଯାଇ ପ୍ରତ୍ୟେକ ବିଷୟରେ ନିଜର ଭିନ୍ନ ମତ ଉପସ୍ଥାପନ କରିଥାନ୍ତି ଓ ଏଇଥିପାଇଁ ବେଳେ ବେଳେ ନିଜର ଅନେକ ଶତ୍ରୁ ସୃଷ୍ଟି କରିଥାନ୍ତି ।

ବିଭିନ୍ନ ସଂସ୍କୃତିରେ ୧୩ର ଅଶୁଭତ୍ୱ

ବିଭିନ୍ନ ଦେଶ ତଥା ବିଭିନ୍ନ ସଂସ୍କୃତିରେ ୧୩କୁ ଏକ ଅଶୁଭ ସଂଖ୍ୟା ଭାବେ ବିଶ୍ୱାସ (ଅନ୍ଧ ବିଶ୍ୱାସ) ରହିଛି । ତେଣୁ ଅନେକ ଲୋକ ୧୩ ସଂଖ୍ୟା ବିଶିଷ୍ଟ କୌଣସି ବସ୍ତୁ ତଥା ସମୟକୁ ଅଶୁଭ ମନେ କରିଥାନ୍ତି । ଏ ସଂପର୍କରେ ଅନେକ ଅନ୍ଧ ବିଶ୍ୱାସ ଏବେ ବି ପ୍ରଚଳିତ ଥିବା ଦେଖାଯାଏ । ୧୩ର ଅଶୁଭତ୍ୱକୁ ନେଇ ରହିଥିବା ଏହି ଭୟକୁ ଇଂରାଜୀରେ ତ୍ରୀଶକାଇଡେକାଇଫୋବିଆ(Triskaidekaphobia) କହନ୍ତି ।

• ଅନେକ ବଡ଼ ବଡ଼ ହୋଟେଲରେ ୧୩ ସଂଖ୍ୟା ବିଶିଷ୍ଟ ତଳ/କୋଠରୀ ରଖାଯାଏ ନାହିଁ ।
• ଯିଶୁଙ୍କ ଶେଷ ରାତ୍ରୀ-ଭୋଜନ ବେଳେ ଗୋଟିଏ ଟେବୁଲରେ ୧୩ ଜଣ ଖାଇବସିଥିଲେ । ଅତଏବ ଗୋଟିଏ ଟେବୁଲରେ ୧୩ ଜଣ ଖାଇବସିବା ଅଶୁଭ ବୋଲି ବିଶ୍ୱାସ ରହିଛି ।
• ଓଡ଼ିଆ ମଳ ମାସ ହେଉଛି ବର୍ଷର ୧୩ତମ ମାସ , ତେଣୁ ହିନ୍ଦୁ ସଂସ୍କୃତିରେ ଏହି ମାସରେ କୌଣସି ଶୁଭ କାର୍ଯ୍ୟ କରାଯାଏ ନାହିଁ ।
• ହିନ୍ଦୁ ସଂସ୍କୃତିରେ ୧୩ ଦିନରେ ଘରକୁ ଫେରିବା ଅଶୁଭ ମାନନ୍ତି ।
• ଆପୋଲ-୧୩ ଅଭିଯାନ ବିଫଳ ହେବା ପଛରେ ଏହି ସଂଖ୍ୟା ଜଡ଼ିତ ବୋଲି ଅନେକେ ବିଶ୍ୱାସ କରନ୍ତି ।