ସୀତାଦେବୀ ଖାଡ଼ଙ୍ଗା

ସୀତାଦେବୀ ଖାଡ଼ଙ୍ଗା (୧୯୦୨ - ୧୯୮୩) ଜଣେ ମହିଳା ସ୍ୱାଧୀନତା ସଂଗ୍ରାମୀ ତଥା ନାଟ୍ୟକାର । ସେ ଏକାଧାରରେ ଜଣେ ଲେଖିକା, ପ୍ରାବନ୍ଧିକା, ଔପନ୍ୟାସିକା ତଥା ଅନୁବାଦିକା । ସୀତାଦେବୀ ଖାଡ଼ଙ୍ଗାଙ୍କ ଜନ୍ମ ୧୯୦୨ ମସିହାରେ ଗଞ୍ଜାମ ଜିଲ୍ଲାର ଆସ୍କାରେ ହୋଇଥିଲା । ତାଙ୍କ ପିତା ହରିହର ପଣ୍ଡା ସେ ସମୟରେ ନିଜ ଜିଲ୍ଲାରେ ଜଣେ ଆଗଧାଡ଼ିର ଓକିଲ ଓ ସ୍ୱାଧୀନତା ସଂଗ୍ରାମୀ ମଧ୍ୟ ଥିଲେ । ସୀତାଦେବୀ କୌଣସି ବିଦ୍ୟାଳୟ କିମ୍ବା ସଂସ୍ଥାନରୁ ଔପଚାରିକ ଶିକ୍ଷା ଗ୍ରହଣ କରିନଥିଲେ । କିନ୍ତୁ ପାରିବାରିକ ପ୍ରେରଣା ତାଙ୍କୁ ଜୀବନରେ ସଫଳତା ଦେଇଥିଲା ।

ଓଡ଼ିଆ ସାହିତ୍ୟକୁ ଅବଦାନ

ସୀତାଦେବୀ ବିଭିନ୍ନ ନାଟକର କାହାଣୀ ତଥା ପୁସ୍ତକ ଲେଖି ନିଜର ଏକ ଭିନ୍ନ ପରିଚୟ ସୃଷ୍ଟି କରିଯାଇଛନ୍ତି । ତାଙ୍କ ଲିଖିତ ନାଟକ ଗୁଡ଼ିକ ମଧ୍ୟରୁ ସହୋଗର, ନାରୀ, ମନ୍ଦିର ପ୍ରବେଶ, ନୈଷ୍ଠିକ, ନିଷ୍ପତ୍ତି, ପ୍ରାଚୀନ, ପନ୍ଥ, ବସୁଧାର ପୀଡ଼ା, ମାତୃହୀନ ଇତ୍ୟାଦି । ଏହାସହ ସେ ଅନେକ ଉପନ୍ୟାସ ମଧ୍ୟ ଲେଖିଛନ୍ତି । ସେଗୁଡିକ ହେଲା, ପୋଷ୍ୟପୁତ୍ର, ପ୍ରତ୍ୟାବର୍ତ୍ତନ, ଅଗ୍ରଜ ଇଥ୍ୟାଦି । ଏହି ନାଟକ ତଥା ପୁସ୍ତକ ଗୁଡ଼ିକ ସମାଜର ବିଭିନ୍ନ ସମସ୍ୟା ଉପରେ ଆଧାରିତ । ଯାହା ସମାଜ ପାଇଁ ପରିବର୍ତ୍ତନର ବାର୍ତ୍ତା ନେଇ ଆସିଥାଏ ।

ରାଜନୀତି ଜୀବନ

ସୀତାଦେବୀ ଗଞ୍ଜାମ ଜିଲ୍ଲା କଂଗ୍ରେସ ଦଳରେ ଜଣେ ସକ୍ରିୟ ରାଜନେତା ଭାବେ କାର୍ଯ୍ୟରତ ଥିଲେ । ସ୍ୱାଧୀନତା ସଂଗ୍ରାମରେ ତାଙ୍କର ଯୋଗଦାନ ତାଙ୍କୁ ସମାଜର ପରିବର୍ତ୍ତନ ଧାରାରେ ସାହାଯ୍ୟ କରିଥିଲା | ଏହାସହ ସେ ନିଜ ଜିଲ୍ଲାରେ ମହିଳା ସଶକ୍ତିକରଣ ଦିଗରେ ମଧ୍ୟ ଅନେକ ଉନ୍ନତିମୂଳକ କାର୍ଯ୍ୟ କରିଥିଲେ ।

ବ୍ୟକ୍ତିଗତ ଜୀବନ

ଔପଚାରିକ ଭାବେ ଶିକ୍ଷା ଗ୍ରହଣ ନକରିଥିଲେ ସୁଦ୍ଧା ତାଙ୍କୁ ପରିବାର ତଥା ସ୍ୱାମୀଙ୍କଠାରୁ ଅନେକ ପ୍ରେରଣା ମିଳିଥିଲା । ଯାହାଫଳରେ ସ୍ୱାଧୀନତା ସଂଗ୍ରାମରେ ଯୋଗ ଦେବା ସହ ସେ ଜଣେ ସଫଳ ସମାଜସେବୀ ମଧ୍ୟ ହୋଇପାରିଥିଲେ । ସୀତାଦେବୀଙ୍କ ଆତ୍ମଜୀବନୀ ମଧ୍ୟ ରହିଛି, ଯାହାର ନାଁ ମୋର ଜୀବନ ସ୍ମୃତି । ଏହି ଆତ୍ମଜୀବନୀର ଲେଖା ସରିଥିଲା ୧୯୭୬ ମସିହାରେ ସରିଥିଲା ଓ ୧୯୭୮ ମସିହାରେ ଏହା ପ୍ରକାଶିତ ହୋଇଥିଲା ।