ବାପି ହାଁସ୍ଦା
 | |
| ବ୍ୟକ୍ତିଗତ ତଥ୍ୟ | |
|---|---|
| ଜାତୀୟତା | ଭାରତୀୟ |
| ଜନ୍ମ | ୨୬ ଜୁଲାଇ ୨୦୦୬ |
| ସକ୍ରିୟ ବର୍ଷ | ୨୦୧୯ରୁ ଅଦ୍ୟାବଧି |
| Sport | |
| କ୍ରୀଡ଼ା | ଦୌଡ଼କୁଦ |
ବାପି ହାଁସ୍ଦା ( ଜନ୍ମ : ୨୬ ଜୁଲାଇ ୨୦୦୬) ଜଣେ ଭାରତୀୟ ଧାବକ ।[୧][୨] ସେ ୪୦୦ ମି, ୪୦୦ ମି ବାଧାଦୌଡ଼, ୪୦୦ ମି ରିଲେ ରେସ ଆଦି ବିଭାଗରେ ପ୍ରତିଦ୍ୱନ୍ଦିତା କରନ୍ତି । ୨୦୨୩ ମସିହାରେ ୪୦୦ ମିଟର ବାଧାଦୌଡରେ ସେ ୫୧.୯୦ ସେକେଣ୍ଡର ସମୟ ନେଇ ୧୮ ବର୍ଷରୁ କମ୍ ବୟସ ବର୍ଗରେ ବିଶ୍ୱର ଦ୍ରୁତତମ ବାଧାଦୌଡ ଧାବକ ଭାବରେ ରେକର୍ଡ଼ ଅର୍ଜନ କରିଥିଲେ ।[୩] ୨୦୨୪ ମସିହାରେ ଅନୁଷ୍ଠିତ ହେଉଥିବା ୨୦ବର୍ଷରୁ କମ ବିଶ୍ୱ ଦୌଡ଼କୁଦ ପ୍ରତିଯୋଗିତାରେ ସେ ଭାରତୀୟ ଦଳରେ ସାମିଲ ହୋଇଥିଲେ ।
ଖେଳ ଜୀବନ
[ସମ୍ପାଦନା]ବାପି ୨୦୧୯ରେ କଳିଙ୍ଗ ଷ୍ଟାଡ଼ିଅମସ୍ଥିତ ଓଡ଼ିଶା ରିଲାଏନ୍ସ ଫାଉଣ୍ଡେସନ ଆଥ୍ଲେଟିକ୍ସ ଉଚ୍ଚ ଗୁଣବତ୍ତା କେନ୍ଦ୍ରରେ(ଏଚପିସି - ହାଇ ପରଫରମାନ୍ସ ସେଣ୍ଟର) ଯୋଗ ଦେଇଥିଲେ । ସେ ଆରମ୍ଭରୁ ୮୦୦ ମିଟରରେ ପ୍ରତିଦ୍ବନ୍ଦ୍ବିତା କରୁଥିଲେ । ପରବର୍ତ୍ତୀ ସମୟରେ ସେ ଏଚପିସିର ମୁଖ୍ୟ ପ୍ରଶିକ୍ଷକ ମାର୍ଟିନ ଓୱେନ୍ସଙ୍କ ପରାମର୍ଶରେ ୪୦୦ ମିଟର ବାଧାଦୌଡ଼ ଓ ଦୌଡ଼ରେ ଖେଳିଥିଲେ । ୨୦୨୩ ମସିହା ମାର୍ଚ୍ଚରେ ଉଡୁପିରେ ଆୟୋଜିତ ହୋଇଥିବା ଅଷ୍ଟାଦଶ ଜାତୀୟ ଯୁବ ଦୌଡ଼କୁଦ ପ୍ରତିଯୋଗିତାରେ ସେ ୪୦୦ ମିଟର ବାଧାଦୌଡ଼ରେ ବିଜେତା ହୋଇଥିଲେ । ସେ ହିଟ୍ରେ ୫୧.୯୦ ସେକେଣ୍ଡ ଓ ଫାଇନାଲ୍ରେ ୫୧.୯୫ ସେକେଣ୍ଡରେ ରେସ୍ ଶେଷ କରିଥିଲେ । ୨୦୨୩ ମସିହା ଅପ୍ରେଲ ମାସରେ ସେ ପ୍ରଥମ ଭାରତୀୟ ଭାବେ ୨୦୨୩ ଏସୀୟ ଯୁବ ଦୌଡ଼କୁଦ ପ୍ରତିଯୋଗିତା (ଉଜବେକିସ୍ତାନ)ରେ ରୌପ୍ୟ ଜିତି ଇତିହାସ ରଚିଥିଲେ । ପୋର୍ଟ ଅଫ୍ ସ୍ପେନ୍ରେ ହୋଇଥିବା ରାଜ୍ୟଗୋଷ୍ଠୀ କ୍ରୀଡ଼ାରେ ସେ ୪୦୦ ମିଟର ବାଧାଦୌଡ଼ ଫାଇନାଲ୍ରେ ପହଞ୍ଚିଥିଲେ । ୨୦୨୪ ମସିହାରେ ଲକ୍ଷ୍ନୌରେ ଆୟୋଜିତ ୨୦ ବର୍ଷରୁ କମ୍ ଜାତୀୟ ଫେଡେରେସନ କପ୍ରେ ୪୦୦ ମିଟର ଦୌଡ଼ରେ ବ୍ୟକ୍ତିଗତ ଶ୍ରେଷ୍ଠ ସମୟ ୪୬.୯୦ ସେକେଣ୍ଡ ସହ ସ୍ବର୍ଣ୍ଣ ପଦକ ଜିତିଥିଲେ । ୨୦୨୪ ମସିହା ଜୁନ ମାସରେ ବିଳାସପୁରଠାରେ ଅନୁଷ୍ଠିତ ହୋଇଥିବା ୧୮ ବର୍ଷରୁ କମ୍ ପ୍ରତିଯୋଗିତାରେ ସେ ପ୍ରଥମ ସ୍ଥାନ ଅଧିକାର କରିଥିଲେ ।[୪]
ବ୍ୟକ୍ତିଗତ ଜୀବନ
[ସମ୍ପାଦନା]ବାପି ୨୦୦୬ ମସିହାରେ ବାଲେଶ୍ୱର ଜିଲ୍ଲାର ବସ୍ତାଠାରେ ଜନ୍ମଗ୍ରହଣ କରିଥିଲେ । ପିଲାଦିନ ତାଙ୍କର ଦାରିଦ୍ର୍ୟରେ ବିତିଥିଲା । ୫ ଭାଇଭଉଣୀଙ୍କ ମଧ୍ୟରେ ବାପି ଥିଲେ ସର୍ବକନିଷ୍ଠ । ୨୦୦୮ ମସିହାରେ ତାଙ୍କ ପିତାଙ୍କ ପରଲୋକ ଘଟିଥିଲା । ତାଙ୍କର ବଡ଼ ଭାଇ ରେଳ ଷ୍ଟେସନରେ ଝାଡ଼ୁଦାର କାର୍ଯ୍ୟ କରନ୍ତି । ସ୍ୱଳ୍ପ ଆୟ ମଧ୍ୟରେ ସେ ବାପିଙ୍କର ଟ୍ରେନିଂ ଖର୍ଚ୍ଚ ଉଠାଉଥିଲେ । ୨୦୧୯ ମସିହାରେ ଓଡ଼ିଶା ରିଲାଏନ୍ସ ଫାଉଣ୍ଡେସନ ଆଥ୍ଲେଟିକ୍ସ ଉଚ୍ଚ ଗୁଣବତ୍ତା କେନ୍ଦ୍ରରେ ଯୋଗଦେବା ପରେ ବାପିଙ୍କ ଖେଳରେ ବ୍ୟାପକ ଉନ୍ନତି ଆସିଥିଲା ।[୫]
ଆଧାର
[ସମ୍ପାଦନା]- ↑ "Bapi HANSDA". worldathletics.org. 1 January 1996. Retrieved 27 August 2024.
- ↑ Digital, Sambad (24 January 2024). "୮୮ ଖେଳାଳିଙ୍କୁ ୧୯.୬ ଲକ୍ଷ ପ୍ରୋତ୍ସାହନ". Sambad. Retrieved 27 August 2024.
- ↑ Muduli, Satarupa (24 March 2023). "ବାପି ହାଁସଦାଙ୍କୁ ସମ୍ମାନିତ କଲେ ମୁଖ୍ୟମନ୍ତ୍ରୀ". Dharitri Odia News. Retrieved 27 August 2024.
- ↑ Kanta, Surya (27 August 2024). "ଭାରତୀୟ ଦଳରେ ଯୋଗଦେଲେ ବାପି". Sambad. Retrieved 27 August 2024.
- ↑ Chettiar, Ronald (2 May 2023). "Who is Bapi Hansda? The rising star of Indian athletics". Olympics.com. Retrieved 27 August 2024.