ବର୍ଫି
| ବର୍ଫି | |
|---|---|
| ନିର୍ଦ୍ଦେଶକ | ଅନୁରାଗ ବସୁ |
| ପ୍ରଯୋଜକ | ସିଦ୍ଧାର୍ଥ ରାୟ କପୁର ରୁନୀ ସ୍କୃବାଲା |
| ଚିତ୍ରନାଟ୍ୟ | ଅନୁରାଗ ବସୁ |
| କାହାଣୀ | ଅନୁରାଗ ବସୁ ତାନି ବସୁ |
| କଳାକାର |
|
| ବର୍ଣ୍ଣନା | ଇଲିଆନା ଡିକ୍ରୁଜ |
| ସଙ୍ଗୀତ | ପ୍ରିତମ |
| ଚିତ୍ରଗ୍ରହଣ | ରବି ବର୍ମଣ |
| ସମ୍ପାଦକ | ଅକିବ ଅଲ୍ଲୀ |
Production company | ଇଶାନ ମୁଭିଜ୍ |
| ବିତରକ | ୟୁଟିଭି ମୋସନ ପିକ୍ଚରସ୍ |
ମୁକ୍ତିଲାଭ ତାରିଖ | ୧୪ ସେପ୍ଟେମ୍ବର ୨୦୧୨ |
କଥାଚିତ୍ରର ସମୟ | ୧୫୦ ମିନିଟ୍[୧] |
| ଦେଶ | ଭାରତ |
| ଭାଷା | ହିନ୍ଦୀ |
| ଖର୍ଚ୍ଚ | ୪୦ କୋଟି[୨] |
| ମୋଟ ଆୟ | ୩୧୦ କୋଟି[୩] |
ବର୍ଫି, ୨୦୧୨ରେ ମୁକ୍ତିଲାଭ କରିଥିବା ହିନ୍ଦୀ କଥାଚିତ୍ର । ଏହି କଥାଚିତ୍ରଟିର ପ୍ରଯୋଜନା କରିଥିଲେ ସିଦ୍ଧାର୍ଥ ରାୟ କପୁର ଏବଂ ରୁନୀ ସ୍କୃବାଲା । ତାନି ବସୁ ଓ ଅନୁରାଗ ବସୁ ଏହି କଥାଚିତ୍ରଟିର କାହାଣୀ ରଚନା କରିଥିଲେ । ଅନୁରାଗ ବସୁ ଏହି କଥାଚିତ୍ରଟିର ଚିତ୍ରନାଟ୍ୟ ରଚନା କରିଥିଲେ ଏବଂ ନିର୍ଦ୍ଦେଶନା ଦେଇଥିଲେ । ସଙ୍ଗୀତ ନିର୍ଦ୍ଦେଶକ ପ୍ରିତମ ଏହି କଥାଚିତ୍ରଟିର ସ୍ୱର ସଂଯୋଜନା କରିଥିଲେ । ରବି ବର୍ମଣ ଏହି କଥାଚିତ୍ରଟିର ଚିତ୍ରଗ୍ରହଣ କରିଥିଲେ ଏବଂ ଅକିବ ଅଲ୍ଲୀ ଏହି କଥାଚିତ୍ରଟିର ସମ୍ପାଦନା କରିଥିଲେ । ୟୁଟିଭି ମୋସନ ପିକ୍ଚରସ୍ ଏହି କଥାଚିତ୍ରଟିର ବିତରଣ କରିଥିଲେ । ୪୦ କୋଟି ବ୍ୟୟରେ ନିର୍ମିତ ଏହି କଥାଚିତ୍ରଟିର ପାଖାପାଖି ୩୧୦ କୋଟି ଆୟ କରିଥିଲା ।
ଏହି କଥାଚିତ୍ରଟିର ମୁଖ୍ୟ ଭୂମିକାରେ ଅଭିନୟ କରିଥିଲେ ରଣବୀର କପୁର ଓ ପ୍ରିୟଙ୍କା ଚୋପ୍ରା । ଇଲିଆନା ଡିକ୍ରୁଜ ଏହି ଚଳଚ୍ଚିତ୍ରରେ ଜଣେ ସହକାରୀ କଳାକାର ଭୂମିକାରେ ଅଭିନୟ କରିଥିଲେ । ଇଲିଆନା ଏହି ଚଳଚ୍ଚିତ୍ର ଜରିଆରେ ପ୍ରଥମଥର ପାଇଁ ହିନ୍ଦୀ କଥାଚିତ୍ର ଜଗତରେ ଅଭିନୟ କରିଥିଲେ । ସୌରଭ ଶୁକ୍ଳା, ଆକାଶ ଖୁରାନା, ଆଶିଷ ବିଦ୍ୟାର୍ଥୀ, ରୂପା ଗାଙ୍ଗୁଲି, ହରାଧନ ବନ୍ଧୋପାଦ୍ଧ୍ୟାୟ, ସୁମୋନା ଚକ୍ରବର୍ତ୍ତୀ ଆଦି କଳାକାରମାନେ ଏହି କଥାଚିତ୍ରଟିର ବିଭିନ୍ନ ଭୂମିକାରେ ଅଭିନୟ କରିଥିଲେ ।
ଏହି କଥାଚିତ୍ରଟି ଭାରତର ପ୍ରତିନିଧି ହିସାବରେ ୮୫ତମ ଆକାଡେମୀ ପୁରସ୍କାରକୁ ମନୋନୀତ କରାଯାଇଥିଲା । ଭାରତୀୟ ଚଳଚ୍ଚିତ୍ର ଜଗତର ଅନେକ ପୁରସ୍କାର ଜିତିଥିଲା ଏହି କଥାଚିତ୍ରଟି । ୫୮ତମ ଫିଲ୍ମଫେୟାର ଚଳଚ୍ଚିତ୍ର ପୁରସ୍କାର ଉତ୍ସବରେ ଏହି କଥାଚିତ୍ରଟିର ସମୁଦାୟ ୧୩ଟି ପୁରସ୍କାର ପାଇଥିଲା ।
ଅଭିନୟ
[ସମ୍ପାଦନା]- ରଣବୀର କପୁର - ମର୍ଫି/ବର୍ଫି
- ପ୍ରିୟଙ୍କା ଚୋପ୍ରା - ଝିଲିମିଲ ଚାଟାର୍ଜୀ
- ଇଲିଆନା ଡିକ୍ରୁଜ - ଶ୍ରୁତି ସେନଗୁପ୍ତା
- ସୌରଭ ଶୁକ୍ଳା - ଇନିସ୍ପେକ୍ଟର
- ଆକାଶ ଖୁରାନା - ବର୍ଫିର ବାପା
- ଆଶିଷ ବିଦ୍ୟାର୍ଥୀ - ଝିଲିମିଲର ବାପା
- ରୂପା ଗାଙ୍ଗୁଲି - ଶ୍ରୁତିର ମାଆ
- ହରାଧନ ବନ୍ଧୋପାଦ୍ଧ୍ୟାୟ - ଦାଦୁ
- ସୁମୋନା ଚକ୍ରବର୍ତ୍ତୀ - ଶ୍ରୁତିର ସାଙ୍ଗ
କାହାଣୀ
[ସମ୍ପାଦନା]ମର୍ଫି ଜନ୍ସନ୍ (ରଣବୀର କପୁର) ଜଣେ ସୁନ୍ଦର ଓ ସୁଶୀଳ ଯୁବକ, ଯିଏକି ଜନ୍ମରୁ ମୂକ ଓ ବଧୀର ଥିଲା । ସେ ଦାର୍ଜିଲିଂର ଜଣେ ନେପାଳୀ ଓ ଭାରତୀୟ ବଂଶଧର ଥିଲା । ତା'ର ଶେଶବରେ ହିଁ ତା'ର ମାଆ ମରିଯାଇଥିଲା ଏବଂ ତା'ର ବାପା ହିଁ ତାକୁ ଛୋଟରୁ ବଡ଼ କରିଥିଲେ । ମର୍ଫିର ଜନ୍ମବେଳେ ତା'ର ବାପା ଗୋଟିଏ ମର୍ଫି ରେଡିଓ ଆଣିଥିଲେ, ତେଣୁ ତା'ର ମାଆ ତା' ନାଁ ମର୍ଫି ରଖିଥିଲେ । ମାତ୍ର ସେ ମୂକ ଥିବାରୁ, ତା'ର କଥା କହିବା ଶୈଳୀରେ ସେ ତା'ର ନାଁ କହିଲାବେଳେ ବର୍ଫି ଶୁଭୁଥିଲା । ସେଇଥିପାଇଁ ସଭିଏଁ ତାକୁ ବର୍ଫି ଭାବରେ ଜାଣିଥିଲେ ।
ବର୍ଫି ସବୁବେଳେ ତା'ର ଉପଦ୍ରବ ଜାରି ରଖିଥାଏ । ସେ ରାତିରେ ଜଳୁଥିବା ରାସ୍ତାକଡ଼ ଆଲୋକର ଖୁଣ୍ଟକୁ ସବୁବେଳେ କାଟିଦେଉଥିଲା, ସାଧାରଣ ସିଧାସାଧା ଲୋକଙ୍କ ଉପରେ କଟାକ୍ଷା କରୁଥିଲା ଏବଂ ସବୁଠାରୁ ବେଶୀ ହଇରାଣ କରୁଥିଲା ସେଠାକାର ସ୍ଥାନୀୟ ପୋଲିସ୍ ଅଧିକାରୀ ସୁଧାଂଶୁ ଦତ୍ତକୁ (ସୌରଭ ଶୁକ୍ଳା) । ଥରେ ବର୍ଫି ରାସ୍ତାରେ ତା'ର ସାଇକେଲ ନେଇ ଗଲାବେଳେ ଶ୍ରୁତି ଘୋଷକୁ (ଇଲିଆନା ଡିକ୍ରୁଜ) ଭେଟିଲା, ଯାହାର ରଣଜିତ ସେନଗୁପ୍ତା ସହ ନିର୍ବନ୍ଧ ସରିଥିଲା । ତା'ର ବାହାଘରକୁ ଆଉ ମାତ୍ର ତିନିମାସ ବାକିଥିଲା, ସେତେବେଳେ ସେ ତା'ର ମାଆବାପାଙ୍କ ସହିତ ଦର୍ଜିଲିଂ ବୁଲିବାକୁ ଆସିଥିଲା । ବର୍ଫି ତାକୁ ପ୍ରଥମ ଦେଖାରୁ ପସନ୍ଦ କରିବା ସହ ତାକୁ ନିଜର ପ୍ରେମ ନିବେଦନ କରିଥିଲା, ମାତ୍ର ତା'ର ନିର୍ବନ୍ଧ ସରିଛି ବୋଲି ଜାଣିବା ପରେ ତାକୁ ସାଙ୍ଗ ହେବାକୁ ଅନୁରୋଧ କରିଥିଲା । ଏହାପରେ ଦୁହେଁ ସାଙ୍ଗ ହୋଇଯାଇଥିଲା ଏବଂ ଧୀରେ ଧୀରେ ଶ୍ରୁତି ମଧ୍ୟ ତା'ର ପ୍ରତି ଆକୃଷ୍ଟ ହୋଇଥିଲା ଏବଂ ତାକୁ ପ୍ରେମ କରିବାରେ ଲାଗିଥିଲା । ମାତ୍ର ବର୍ଫିର ଟଙ୍କାପଇସାରେ ଅଭାବ ଯୋଗୁଁ ତା'ର ପିତାମାତା ତାକୁ ସେଠାରେ ବିବାହ କରାଇଲେ ନାହିଁ । ଫଳରେ ଶ୍ରୁତି ତା'ର ମାଆ କଥାରେ ବାହା ହୋଇ କଲିକତା ଚାଲିଗଲା ଏବଂ ତା'ର ବର୍ଫି ସମସ୍ତ ସମ୍ପର୍କ କଟିଯାଇଥିଲା ।
ଏହା ପରେ ପରେ ବର୍ଫିର ବାପା ବେମାର ପଡ଼ିଲେ । ତେଣୁ ତାଙ୍କର ଚିକିତ୍ସା ପାଇଁ ତାକୁ କୌଣସିମତେ ଟଙ୍କା ଯୋଗାଡ଼ କରିବାର ଥିଲା । ତେଣୁ ସେ ସେଠାକାର ସ୍ଥାନୀୟ ବ୍ୟାଙ୍କରୁ ଟଙ୍କା ଲୁଟିବା ପାଇଁ ଏକ ବିଫଳ ପ୍ରଚେଷ୍ଟା ମଧ୍ୟ କରିଥିଲା ଏବଂ ତା'ର ପିଲାଦିନର ସାଙ୍ଗ ଝିଲମିଲ ଚାଟାର୍ଜୀକୁ (ପ୍ରିୟଙ୍କା ଚୋପ୍ରା) ମଧ୍ୟ ଅପହରଣ କରିଥିଲା । ଝିଲିମିଲ ବର୍ଫିର ପିଲାଦିନର ସାଙ୍ଗ ଥିଲା । ଝିଲମିଲର ମସ୍ତିକ ଦୋଷ ଥିଲା, ସେ ସବୁବେଳେ ନିଜର କଥାରେ ହିଁ ମଜ୍ଜି ରହୁଥିଲା । ଝିଲମିଲର ଜେଜେ ଜଣେ ବଡ଼ ଧନୀ ବ୍ୟକ୍ତି ଥିଲେ । ଝିଲିମିଲକୁ ଅନ୍ୟ କେହି ଅପହରଣ କରିନେଉଥିବାବେଳେ ବର୍ଫି ତାକୁ ନିଜେ ବଞ୍ଚେଇ ଅପହରଣ କରିଥିଲା । ଏହାପରେ ସେ ଝିଲମିଲକୁ ଛାଡ଼ିବା ପାଇଁ ଦଶହଜାର ଟଙ୍କା ମାଗିଥିଲା, ମାତ୍ର ସେତେବେଳକୁ ତା'ର ବାପାଙ୍କର ଦେହାନ୍ତ ହୋଇସାରିଥିଲା । ଏହାପରେ ବର୍ଫି ଝିଲମିଲକୁ ସେହି ଗାଁରେ ଥିବା ତା'ର ଦେଖଶୁଣା କରିବାକୁ ଥିବା ଲୋକ ପାଖରେ ଛାଡ଼ିବାକୁ ଚାହିଁଲା, ମାତ୍ର ସେ ସେଠାରେ ରହିବାକୁ ରାଜି ହେଲାନାହିଁ । ତେଣୁ ବର୍ଫି ତାକୁ ନେଇ କଲିକତା ଚାଲିଗଲା ଏବଂ ନିଜେ ତା'ର ଦେଖାଶୁଣା କଲା ।
ଏହାର ୬ ବର୍ଷପରେ ଶ୍ରୁତି ଏବଂ ବର୍ଫିର ପୁଣି ଦେଖାହେଲା । ସେତେବେଳେ ଶ୍ରୁତି ଝିଲମିଲ ବିଷୟରେ ବି ଜାଣିଲା । ମାତ୍ର କିଛିଦିନ ପରେ ଝିଲମିଲର ପୁଣି ଅପହରଣ ହେଇଗଲା । ଏହି ବିଷୟରେ ଶ୍ରୁତି ପୋଲିସରେ ଅଭିଯୋଗ କଲା । ପୋଲିସ ଖୋଳତାଡ଼ କଲାପରେ ବର୍ଫିକୁ ଗିରଫ କଲା । ଝିଲିମିଲକୁ ଫେରାଇ ଆଣିବା ପାଇଁ ଟଙ୍କା ଦେଲାବେଳେ ସେଠାରେ ଝିଲମିଲର ମୃତ୍ୟୁ ହେଇଯାଇଥିଲା ଏବଂ ଏହିସବୁ ବର୍ଫିର କାମ ଭାବି ପୋଲିସ ତାକୁ ଗିରଫ କରିଥିଲା । ମାତ୍ର ବର୍ଫି ନିର୍ଦ୍ଦୋଶ ଜାଣିବାପରେ ତାକୁ ଛାଡ଼ିଦିଆଯାଇଥିଲା । ଝିଲମିଲ୍ର ମୃତ୍ୟୁର ଦୁଃଖରେ ବର୍ଫି ଭାଙ୍ଗିପଡ଼ିଥିବାବେଳେ ଶ୍ରୁତିକୁ ନେଇ ସେ ଝିଲମିଲ୍ର ସେ ଗାଁ ଘରକୁ ଯାଇଥିଲା ଏବଂ ସେଠାରେ ସେ ଝିଲମିଲ୍କୁ ଜୀବିତ ଅବସ୍ଥାରେ ଦେଖିଲା ।
ଝିଲମିଲ୍ର ଦୁଇଥରଯାକ ଅପହରଣରେ ତା'ର ବାପାର ହାତ ଥିଲା । ଫଳରେ ସେ ଝିଲମିଲ୍ ନାଁରେ ଥିବା ଟ୍ରଷ୍ଟରୁ ଟଙ୍କା ନେଇପାରିବେ । ଏହାପରେ ବର୍ଫି ଓ ଝିଲ୍ମିଲ୍ ସାଙ୍ଗରେ ରହିଲେ । ଶ୍ରୁତି ସେତେବେଳକୁ ତା'ର ପତିଠାରୁ ଅଲଗା ହୋଇସାରିଥିଲା । ସେ ବର୍ଫିସହିତ ରହିବାର ସୁଯୋଗକୁ ହାତଛଡ଼ା କରିଥିବାରୁ ସବୁବେଳେ ସେହିଦିନକୁ ମନେ ପକାଇ ଝୁରୁଥିଲା । ଏହାର କିଛିବର୍ଷ ପରେ ହଠାତ ଦିନେ ବର୍ଫି ଓ ଝିଲମିଲ୍ ହସ୍ତାତାଳରେ ଗୋଟିଏ ବିଛଣାରେ ପ୍ରାଣହରାଇଥିଲେ । ଶ୍ରୁତି ସେମାନଙ୍କର ଜୀବନ କାହାଣୀ ସଭିଙ୍କୁ ଶୁଣାଉଥିଲା ।
ଗୀତ ଓ ସଙ୍ଗୀତ
[ସମ୍ପାଦନା]ଏହି କଥାଚିତ୍ରଟିର ସଙ୍ଗୀତ ନିର୍ଦ୍ଦେଶନା ଦେଇଥିଲେ ପ୍ରିତମ । ସ୍ୱାନନ୍ଦ କିର୍କିରେ, ଆଶିଷ ପଣ୍ଡିତ, ନୀଲେଶ ମିଶ୍ର, ସାୟେଦ୍ ଆଦି ଗୀତିକାରମାନେ ଏହି କଥାଚିତ୍ରଟିର ଗୀତ ରଚନା କରିଥିଲେ । ମୋହିତ ଚୌହାନ, ନିଖିଲ ପଲ୍ ଜର୍ଜ, ପାପୋନ୍, ସୁନିଧି ଚୌହାନ, ଅରିଜିତ ସିଂହ, ଶ୍ରେୟା ଘୋଷାଲ ଆଦି କଣ୍ଠଶିଳ୍ପୀମାନେ ଏହି କଥାଚିତ୍ରଟିରେ କଣ୍ଠଦାନ କରିଥିଲେ ।
ଗୀତ
[ସମ୍ପାଦନା]| Track listing | |||||
|---|---|---|---|---|---|
| କ୍ରମ | ଗୀତ | କବି | ସଙ୍ଗୀତ | Singer(s) | ସମୟ |
| 1. | "ଆଲା ବର୍ଫି" | ସ୍ୱାନନ୍ଦ କିର୍କିରେ | ପ୍ରିତମ | ମୋହିତ ଚୌହାନ | ୫:୧୯ |
| 2. | "ମେଁ କ୍ୟା କରୁଁ" | ଆଶିଷ ପଣ୍ଡିତ | ପ୍ରିତମ | ନିଖିଲ ପଲ୍ ଜର୍ଜ | ୪:୩୦ |
| 3. | "କୌନ୍" | ନୀଲେଶ ମିଶ୍ର | ପ୍ରିତମ | ପାପୋନ୍, ସୁନିଧି ଚୌହାନ | ୪:୨୬ |
| 4. | "ଫିର୍ ଲେ ଆୟା ଦିଲ୍" | ସାୟେଦ୍ | ପ୍ରିତମ | ଅରିଜିତ ସିଂହ | ୫:୦୫ |
| 5. | "ଆଶିୟାଁ" | ସ୍ୱାନନ୍ଦ କିର୍କିରେ | ପ୍ରିତମ | ଶ୍ରେୟା ଘୋଷାଲ, ନିଖିଲ ପଲ୍ | ୩:୫୬ |
| 6. | "ସାୱଲି ସି ରାତ୍" | ସ୍ୱାନନ୍ଦ କିର୍କିରେ | ପ୍ରିତମ | ଅରିଜିତ ସିଂହ | ୫:୦୮ |
ଆଧାର
[ସମ୍ପାଦନା]- ↑ "Barfi! (PG)". British Board of Film Classification. 11 September 2012. Archived from the original on 31 January 2016. Retrieved 1 October 2012.
- ↑ Thakkar, Mehul S (22 September 2012). "Directors who got their mojo back". The Times of India. Archived from the original on 25 October 2012. Retrieved 11 April 2013.
- ↑ "Top Ten Worldwide Grossers 2012". Box Office India. 17 January 2013. Archived from the original on 2 June 2013. Retrieved 11 April 2013.
ବାହାର ଆଧାର
[ସମ୍ପାଦନା]
- Official website
- ଇଣ୍ଟରନେଟ ମୁଭି ଡାଟାବେସରେ ବର୍ଫି