ଓଡ଼ିଶା ରାଜ୍ୟ ବିଧି ଆୟୋଗ

ଓଡ଼ିଶା ରାଜ୍ୟ ବିଧି ଆୟୋଗ ଓଡ଼ିଶା ସରକାରଙ୍କଦ୍ୱାରା ଗଠିତ ଏକ ସାମ୍ବିଧାନିକ ସଂସ୍ଥା ଯାହା ଆବଶ୍ୟକ ସ୍ଥଳେ ରାଜ୍ୟ ସରକାରଙ୍କୁ ଆଇନଗତ ପ୍ରସଙ୍ଗରେ ଗୁରୁତ୍ୱପୂର୍ଣ୍ଣ ପରାମର୍ଶ ଦିଏ । ଓଡ଼ିଶା ରାଜ୍ୟ ସରକାରଙ୍କ ୧୯୬୯ ମସିହାର ରାଜ୍ୟ ଆଇନ ସଂଶୋଧନ କମିଟି (The State Law Revision Committee,1969)ର ଏହା ଏକ ବିକଶିତ ରୂପ ।

ପୃଷ୍ଠଭୂମି

ମାର୍ଚ୍ଚ, ୨୦୧୬ରେ ରାଜ୍ୟ ଗେଜେଟରେ ପ୍ରକାଶିତ ଆଇନ ବିଭାଗରେ ଓଡ଼ିଶା ସରକାରଙ୍କ ବିଜ୍ଞପ୍ତି ଅନୁଯାୟୀ ଓଡ଼ିଶା ରାଜ୍ୟ ସରକାରଙ୍କଦ୍ୱାରା ଓଡ଼ିଶା ରାଜ୍ୟ ବିଧି ଆୟୋଗ (OSLC)କୁ ଡିସେମ୍ବର ୨୦୨୪ରେ ପୁନର୍ଗଠନ କରାଯାଇଛି । ଆୟୋଗର ଅଧ୍ୟକ୍ଷ ଭାବେ ଓଡ଼ିଶା ଉଚ୍ଚ ନ୍ୟାୟାଳୟର ପୂର୍ବତନ ବିଚାରପତି ଜଷ୍ଟିସ ବିଶ୍ୱନାଥ ରଥଙ୍କୁ ନିଯୁକ୍ତି ଦିଆଯାଇଛି । ଏହି ବିଜ୍ଞପ୍ତି ଅନୁଯାୟୀ ବରିଷ୍ଠ ଆଇନଜୀବୀ ସୂର୍ଯ୍ୟ ପ୍ରସାଦ ମିଶ୍ର ଏବଂ ସୌର ଚନ୍ଦ୍ର ମହାପାତ୍ର ମଧ୍ୟ ସଦସ୍ୟ ଭାବରେ ଏହି ପ୍ୟାନେଲରେ ଅନ୍ତର୍ଭୁକ୍ତ ହୋଇଛନ୍ତି । ଏକ୍ସ ଅଫିସିଓ ସଦସ୍ୟ ଭାବରେ ପୀତାମ୍ବର ଆଚାର୍ଯ୍ୟ, ଆଡଭୋକେଟ୍ ଜେନେରାଲ୍ ଏବଂ ମାନସ ରଂଜନ ବାରିକ୍, ମୁଖ୍ୟ ଶାସନ ସଚିବ (ଆଇନ ବିଭାଗ) ରହିଛନ୍ତି । ଆୟୋଗର ମୁଖ୍ୟାଳୟ ଭୁବନେଶ୍ୱରରେ ଅବସ୍ଥିତ । ୨୦୧୬ ବିଜ୍ଞପ୍ତି ଅନୁଯାୟୀ, ଅଧ୍ୟକ୍ଷଙ୍କ ତଥା ଅନ୍ୟାନ୍ୟ ପୂର୍ଣ୍ଣକାଳୀନ ଅଣ-ଅଫିସିଆଲ୍ ସଦସ୍ୟମାନଙ୍କ କାର୍ଯ୍ୟ ଅବଧି ସେମାନେ କାର୍ଯ୍ୟଭାର ଗ୍ରହଣ କରିବା ଦିନଠାରୁ ତିନି ବର୍ଷରୁ ଅଧିକ ହେବ ନାହିଁ ଏବଂ ଏହା ସହିତ କାର୍ଯ୍ୟ ଅବଧି ସେମାନଙ୍କ ବୟସ ସତୁରୀ ହେବା ଯାଏଁ ସିମୀତ ରହିବ ।

ଓଡ଼ିଶା ରାଜ୍ୟ ସରକାରଙ୍କ ମତରେ ରାଜ୍ୟରେ ପ୍ରଚଳିତ ଅନେକ ଆଇନ ବର୍ତ୍ତମାନ ସମୟରେ ସେମାନଙ୍କର ପ୍ରାସଙ୍ଗିକତା ହରାଇ‌ଲାଣି । ସେଭଳି ଅଦରକାରୀ ଆଇନକୁ ହଟାଇ ସେହିସ୍ଥାନରେ ଅନ୍ୟ କିଛି ଆବଶ୍ୟକୀୟ ଆଇନ ପ୍ରଚଳନ କରିବା ମଧ୍ୟ ଜରୁରୀ । ଅତଏବ, ଆୟୋଗର ପ୍ରାଥମିକ କାର୍ଯ୍ୟଗୁଡ଼ିକ ହେଉଛି ପ୍ରଚଳିତ ରାଜ୍ୟ ଆଇନ ତଥା ସମବର୍ତ୍ତୀ ତାଲିକାରେ ଅନ୍ତର୍ଭୁକ୍ତ ରାଜ୍ୟ ସମ୍ବନ୍ଧୀୟ ଆଇନଗୁଡ଼ିକର ସମୀକ୍ଷା କରିବ । ଏହାସହ ଏହିସବୁ ଆଇନର ନିରନ୍ତର ଆବଶ୍ୟକତା ଯାଞ୍ଚ କରିବ ଏବଂ ଆବଶ୍ୟକ ସ୍ଥଳେ ଏସବୁର ଆଂଶିକ କିମ୍ବା ସମ୍ପୂର୍ଣ୍ଣ ଭାବରେ ପ୍ରତ୍ୟାହାର, ପ୍ରତିସ୍ଥାପନ ଏବଂ ପରିବର୍ତ୍ତନ ନିମିତ୍ତ ରାଜ୍ୟ ସରକାରଙ୍କୁ ସୁପାରିଶ କରିବ । ଏଥି ନିମିତ୍ତ ଆୟୋଗ ଏକ ଉପକମିଟି ମଧ୍ୟ ଗଠନ କରିପାରିବେ । ଏହି ଉପକମିଟି ଏହି ଉଦ୍ଦେଶ୍ୟରେ ଆବଶ୍ୟକୀୟ ତଥ୍ୟ ଅନୁସନ୍ଧାନମୂଳକ ଦଳ ଭାବେ କର୍ଯ୍ୟକରିବେ ।