ମଦନ ମୋହନ ଦାସ
ମଦନ ମୋହନ ଦାସ (ଜନ୍ମ:୫.୨.୧୯୫୨) ଜଣେ ଭାରତୀୟ ବିଚାରପତି ତଥା ଓଡ଼ିଶା ଉଚ୍ଚ ନ୍ୟାୟାଳୟର ପ୍ରାକ୍ତନ ବିଚାରପତି ।[୧][୨]
ଶିକ୍ଷା ଓ ପେଶା
[ସମ୍ପାଦନା]ଜଷ୍ଟିସ୍ ମଦନ ମୋହନ ଦାସ ଏକ ଆଇନଜୀବୀ ପରିବାରରୁ ଆସିଥିଲେ । ସେ ହେଉଛନ୍ତି ମାଧବାନନ୍ଦ ଦାସଙ୍କ ପୁତ୍ର, ଯିଏ ଓଡ଼ିଶା ଉଚ୍ଚ ନ୍ୟାୟାଳୟର ଜଣାଶୁଣା ବରିଷ୍ଠ ଆଇନଜୀବୀ ଥିଲେ । ତାଙ୍କ ଜନ୍ମ ୫.୨.୧୯୫୨ ତାରିଖରେ ହୋଇଥିଲା। ସେ ୧୯୬୭ ମସିହାରେ ଏଚ.ଏସ.ସି. ପରୀକ୍ଷା ଉତ୍ତୀର୍ଣ୍ଣ ହୋଇଥିଲେ ଏବଂ ୧୯୭୧ ମସିହାରେ କଟକର ରେଭେନ୍ସା କଲେଜରୁ ରସାୟନଶାସ୍ତ୍ର (Chemistry Honours) ସହିତ ସ୍ନାତକ ଡିଗ୍ରୀ ପ୍ରାପ୍ତ ହୋଇଥିଲେ । ସେ ପରେ ଉତ୍କଳ ବିଶ୍ୱବିଦ୍ୟାଳୟ, ଭୁବନେଶ୍ୱରରୁ ରାଜନୀତି ବିଜ୍ଞାନରେ ସ୍ନାତକୋତ୍ତର (M.A.) ଏବଂ ଏମ.ଏସ. ଲ’ କଲେଜ୍ରୁ ଏଲ୍ଏଲ୍.ବି. (LL.B.) ଶିକ୍ଷା ଗ୍ରହଣ କରିଥିଲେ । ସେ ୧୯୭୪ ମସିହାରେ ବାର୍ରେ ଯୋଗଦେଇ ଓକିଲତି ପେଶା ଆରମ୍ଭ କରିଥିଲେ । ଏକ ଓକିଲ ଭାବେ ଆଇନ ବ୍ୟବସାୟ କରିବା ସମୟରେ, ସେ ବିଭିନ୍ନ ନ୍ୟାୟାଳୟରେ ଗୁରୁତ୍ୱପୂର୍ଣ୍ଣ ଦେବାନୀ, ଫୌଜଦାରୀ ଏବଂ ସଂଅବିଧାନିକ ମାମଲାର ପ୍ରତିନିଧିତ୍ୱ କରିଥିଲେ । ସେ ବହୁ ବର୍ଷ ଧରି ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆ ଏବଂ ଅନ୍ୟାନ୍ୟ ଜାତୀୟକୃତ ବ୍ୟାଙ୍କମାନଙ୍କ ଆଇନ ପରାମର୍ଶଦାତା ଭାବେ କାର୍ଯ୍ୟ କରିଥିଲେ । ସେ ଅନେକ ସାମାଜିକ ଏବଂ ଆଧ୍ୟାତ୍ମିକ ସଂଗଠନମାନଙ୍କ ସହ ସକ୍ରିୟ ଭାବେ ସଂପୃକ୍ତ ଥିଲେ ।
ଓଡ଼ିଶା ଉଚ୍ଚ ନ୍ୟାୟାଳୟର ନ୍ୟାୟାଧୀଶ ଭାବେ ନିଯୁକ୍ତ ହେବା ପୂର୍ବରୁ, ସେ ବାର୍ରେ ୨୯ ବର୍ଷ ଧରି ଓକିଲାତି କରିଥିଲେ । ସେ ୨୦.୧୧.୨୦୦୩ ରୁ ୦୪.୦୨.୨୦୧୪ ପର୍ଯ୍ୟନ୍ତ ଓଡ଼ିଶା ଉଚ୍ଚ ନ୍ୟାୟାଳୟର ବିଚାରପତି ଭାବେ ପଦଭାର ଗ୍ରହଣ କରିଥିଲେ ।[୧] କିଛିଦିନ ପାଇଁ ସେ ଓଡ଼ିଶା ଉଚ୍ଚ ନ୍ୟାୟାଳୟର ଆର୍ବିଟ୍ରେସନ କେନ୍ଦ୍ରରେ ପାନେଲଭୁକ୍ତ ହୋଇଥିଲେ ।[୩]
ଆଧାର
[ସମ୍ପାଦନା] | ଏହି ପ୍ରସଙ୍ଗଟି ଅସମ୍ପୂର୍ଣ୍ଣ । ଆପଣ ଏହାକୁ ସଂପୂର୍ଣ୍ଣ କରି ଉଇକିପିଡ଼ିଆକୁ ସମୃଦ୍ଧ କରିପାରିବେ । |
- 1 2 National Informatics Centre (NIC, Orissa). "Former Judges | Orissa High Court, Cuttack". www.orissahighcourt.nic.in (in ଇଂରାଜୀ). Retrieved 2025-01-30.
- ↑ "NAME OF THE JUDGES OF ORISSA HIGH COURT" (PDF). magazines.odisha.gov.in. Archived from the original (PDF) on 30 April 2025. Retrieved 30 January 2025.
- ↑ "(Consolidated Panel of Arbitrators)" (PDF). orissahighcourt.nic.in. Retrieved 30 January 2025.