ବିମଳ ପ୍ରସାଦ ଦାସ

ଜଷ୍ଟିସ୍‌ ବିମଳ ପ୍ରସାଦ ଦାସ
ଓଡ଼ିଶା ଉଚ୍ଚ ନ୍ୟାୟାଳୟର ବିଚାରପତି
କାର୍ଯ୍ୟକାଳ ୧୯୯୯ର ଜୁନ୍ ୧୭ – ୧୪ ନଭେମ୍ବର ୨୦୧୨
ଓଡ଼ିଶା ମାନବ ଅଧିକାର ଆୟୋଗର ଅଧ୍ୟକ୍ଷ
କାର୍ଯ୍ୟକାଳ ୦୪.୦୯.୨୦୧୯ – ୧୪.୧୧.୨୦୨୦
ବ୍ୟକ୍ତିଗତ ସବିଶେଷ
ଜନ୍ମ	୧୫ ନଭେମ୍ବର ୧୯୫୦ କଟକ
ଜାତୀୟତା	ଭାରତୀୟ

ବିମଳ ପ୍ରସାଦ ଦାସ (ଜନ୍ମ: ୧୫ ନଭେମ୍ବର ୧୯୫୦) ଜଣେ ଭାରତୀୟ ବିଚାରପତି ତଥା ଓଡ଼ିଶା ଉଚ୍ଚ ନ୍ୟାୟାଳୟର ପ୍ରାକ୍ତନ ବିଚାରପତି ।

ଶିକ୍ଷା ଓ ପେଶା

ଜଷ୍ଟିସ୍‌ ଦାସ ୧୯୫୦ ମସିହା ନଭେମ୍ବର ୧୫ରେ କଟକ ସହରର ରାମଗଡ଼ରେ ଜନ୍ମ ଗ୍ରହଣ କରିଥିଲେ । ପିତା ଥିଲେ ଗୋଲକ ଚନ୍ଦ୍ର ଦାସ । କଟକର କ୍ରିଷ୍ଟ କଲେଜିଆଟ୍ ସ୍କୁଲରେ ଶିକ୍ଷାଲାଭ କରି ସେ ୧୯୭୦ରେ କଟକର ରେଭେନ୍ସା ବିଶ୍ୱବିଦ୍ୟାଳୟରୁ ସ୍ନାତକ ଡିଗ୍ରୀ ହାସଲ କରିଥିଲେ । ୧୯୭୨ରେ ଉତ୍କଳ ବିଶ୍ୱବିଦ୍ୟାଳୟରୁ ରାଜନୀତି ବିଜ୍ଞାନରେ ସ୍ନାତକୋତ୍ତର ଶିକ୍ଷା ଗ୍ରହଣ କଲେ ଓ ୧୯୭୪ରେ ଉତ୍କଳ ବିଶ୍ୱବିଦ୍ୟାଳୟ ଅଧୀନ ମଧୁସୂଦନ ଆଇନ ବିଶ୍ୱବିଦ୍ୟାଳୟରୁ ଏଲଏଲବି୍ ପାସ୍ କଲେ ।

୧୯୭୪ରେ ଓଡିଶା ଉଚ୍ଚ ନ୍ୟାୟାଳୟ ବାରରେ ଯୋଗ ଦେଲେ ଏବଂ ଶ୍ରୀ ବି କେ. ମହାନ୍ତି, ବରିଷ୍ଠ ଆଡଭୋକେଟଙ୍କ ସହଯୋଗୀ ଭାବେ କାର୍ଯ୍ୟ କଲେ । ୧୯୭୯ରେ ସ୍ଵତନ୍ତ୍ର ଭାବେ ଆଇନ ବ୍ୟବସାୟ ଆରମ୍ଭ କରିଥିଲେ । ସାଂବିଧାନିକ, କର, ଦିୱାନି, ଆଇନଗତ ଇତ୍ୟାଦି ବିଭିନ୍ନ ପ୍ରକାର ମାମଲା ଓଡିଶା ଉଚ୍ଚ ନ୍ୟାୟାଳୟ ଏବଂ ରାଜ୍ୟର ଅଧସ୍ଥନ ନ୍ୟାୟାଳୟରେ ଚଲାଇଥିଲେ । ବିଭିନ୍ନ ପ୍ରତିଷ୍ଠାନ, କର୍ପୋରେସନ ଓ କମ୍ପାନୀଙ୍କ ନିମନ୍ତେ ଆଇନଗତ ପ୍ରତିନିଧି ଭାବରେ କାର୍ଯ୍ୟ କରିଥିଲେ । ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ସିନିଅର କାଉନ୍ସିଲ୍ ଭାବେ ଗୁରୁତ୍ୱପୂର୍ଣ୍ଣ ପରିବେଶ ସମ୍ପର୍କୀୟ ମାମଲାରେ ଓକିଲାତି କରିଥିଲେ । ୧୯୯୬ର ମେ ୧୧ରୁ ୧୯୯୭ର ମେ ୧୪ ପର୍ଯ୍ୟନ୍ତ ଓଡିଶା ରାଜ୍ୟ ବାର କାଉନ୍ସିଲ୍ ସଦସ୍ୟ ଥିଲେ । ୧୯୯୬ର ଡିସେମ୍ବରରୁ ଓଡିଶା ଉଚ୍ଚ ନ୍ୟାୟାଳୟର ଅତିରିକ୍ତ ସରକାରୀ ଆଡଭୋକେଟ୍ ଭାବେ କାର୍ଯ୍ୟ କରିଥିଲେ ।

ପରେ ୧୯୯୯ର ଜୁନ୍ ୧୭ରେ ଓଡିଶା ଉଚ୍ଚ ନ୍ୟାୟାଳୟର ସ୍ଥାୟୀ ନ୍ୟାୟାଧୀଶ ଭାବେ ନିଯୁକ୍ତ ହୋଇଥିଲେ। ଅବସର ପରେ ୦୪.୦୯.୨୦୧୯- ୧୪.୧୧.୨୦୨୦ ଅବଧିରେ ସେ ଓଡ଼ିଶା ମାନବ ଅଧିକାର ଆୟୋଗର ଅଧ୍ୟକ୍ଷ ଭାବେ କାର୍ଯ୍ୟ ସଂପାଦନ କରିଥିଲେ ।