ଫରିଦା ଜଲାଲ

ଫରିଦା ଜଲାଲ
Jalal at the 2024 premiere of Heeramandi
ଜନ୍ମ	Farida Sami (1949-03-14) ୧୪ ମାର୍ଚ୍ଚ ୧୯୪୯ Bombay, Maharashtra, India
ପେଷା	Actress
କାର୍ଯ୍ୟକାଳ	1967 – present
ଜୀବନସାଥୀ	Tabrez Barmavar ​ ​ (m. ୧୯୭୮; died )​
Children	1

ଫରିଦା ଜଲାଲ (ଜନ୍ମନାମ: ଫରିଦା ସାମି; ୧୪ ମାର୍ଚ୍ଚ ୧୯୪୯) ଜଣେ ଭାରତୀୟ ଅଭିନେତ୍ରୀ, ଯିଏ ପ୍ରାୟତଃ ହିନ୍ଦୀ ଚଳଚ୍ଚିତ୍ରରେ କାମ କରିଛନ୍ତି। ପ୍ରାୟ ପଞ୍ଚାଶ ବର୍ଷ ଜୁଡ଼ା ଚଳଚ୍ଚିତ୍ର ଜୀବନରେ, ଜଲାଲ ୨୦୦ରୁ ଅଧିକ ଫିଲ୍ମରେ ଅଭିନୟ କରିଛନ୍ତି। ସ୍ଵତନ୍ତ୍ର ସିନେମାରେ ଚରିତ୍ରମୂଳକ ଭୂମିକା ଓ ସହାୟକ ଭୂମିକା ପାଇଁ ସେ ବେଶି ପରିଚିତ। ସେ ଚାରିଟି ଫିଲ୍ମଫେୟାର ପୁରସ୍କାର ଓ ଦୁଇଟି ବେଙ୍ଗଲ ଫିଲ୍ମ ଜର୍ନାଲିଷ୍ଟ୍ସ ଆସୋସିଏସନ ପୁରସ୍କାର ଭଳି ସମ୍ମାନ ଅର୍ଜନ କରିଛନ୍ତି।

ଜଲାଲ ତାଙ୍କର ଚଳଚ୍ଚିତ୍ର ଜୀବନ ତକଦୀର (୧୯୬୭) ଫିଲ୍ମ ସହିତ ଆରମ୍ଭ କରିଥିଲେ। ୧୯୭୦ ଦଶକ ଓ ୧୯୮୦ ଦଶକର ପ୍ରାରମ୍ଭରେ ସେ ଅନେକ ଚଳଚ୍ଚିତ୍ରରେ ନାୟିକା ଓ ସହାୟକ ଭୂମିକାରେ ଅଭିନୟ କରିଥିଲେ। ଆରାଧନା (୧୯୬୯), ପରସ (୧୯୭୧), ହେନା (୧୯୯୧) ଓ ଦିଲୱାଲେ ଦୁଲହନିଆ ଲେ ଜାୟେଙ୍ଗେ (୧୯୯୫) ଫିଲ୍ମରେ ତାଙ୍କ ଅଭିନୟ ପାଇଁ ସେ ବିଶେଷ ଭାବରେ ସ୍ମରଣୀୟ, ଯାହାର ମଧ୍ୟରୁ ଶେଷ ତିନିଟି ଫିଲ୍ମ ପାଇଁ ସେ ସର୍ବଶ୍ରେଷ୍ଠ ସହାୟକ ଅଭିନେତ୍ରୀ ପାଇଁ ଫିଲ୍ମଫେୟାର ପୁରସ୍କାର ଜିତିଥିଲେ। ୧୯୯୦ ଓ ୨୦୦୦ ଦଶକର ପ୍ରାରମ୍ଭରେ ମାତୃଭୂମିକା ଓ ଶକ୍ତିଶାଳୀ ନାରୀ ପାତ୍ର ଅଭିନୟ କରି ସେ ଘରେ ଘରେ ପରିଚିତ ହୋଇଯାଇଥିଲେ। ମମ୍ମୋ (1994) ଫିଲ୍ମରେ ତାଙ୍କ ଭୂମିକା ପାଇଁ ସେ ସମାଲୋଚକଙ୍କ ପକ୍ଷରୁ ସର୍ବଶ୍ରେଷ୍ଠ ଅଭିନେତ୍ରୀ ପାଇଁ ଫିଲ୍ମଫେୟାର ପୁରସ୍କାର ମଧ୍ୟ ଅର୍ଜନ କରିଥିଲେ। ୨୦୧୨ ମସିହାରେ ଏ ଗ୍ରାନ୍ ପ୍ଲାନ୍ (୨୦୧୨) ଫିଲ୍ମରେ ତାଙ୍କ ଅଭିନୟ ପାଇଁ ସେ ହାର୍ଲେମ୍ ଇଣ୍ଟରନ୍ୟାସନାଲ୍ ଫିଲ୍ମ ଫେଷ୍ଟିଭାଲ୍ରେ ସର୍ବଶ୍ରେଷ୍ଠ ଅଭିନେତ୍ରୀ ପୁରସ୍କାର ଜିତିଥିଲେ।

ସେ ଚଳଚ୍ଚିତ୍ର ସହିତ ସହ ଭାରତୀୟ ଟେଲିଭିଜନରେ ମଧ୍ୟ ଅନେକ କାର୍ଯ୍ୟକ୍ରମରେ କାମ କରିଛନ୍ତି। ତାଙ୍କର କିଛି ପ୍ରସିଦ୍ଧ କାର୍ଯ୍ୟରେ ଏହ୍ ଜୋ ହୈ ଜିନ୍ଦଗୀ, ଦେଖ୍ ଭାଇ ଦେଖ୍ ଓ ଶରାରତ ଅନ୍ତର୍ଭୁକ୍ତ।

କର୍ମଜୀବନ

ଫରିଦା ଜଲାଲଙ୍କ ଜନ୍ମ ୧୪ ମାର୍ଚ୍ଚ ୧୯୪୯ ରେ ବମ୍ବେ (ବର୍ତ୍ତମାନ ମୁମ୍ବାଇ)ରେ ହୋଇଥିଲା। ସେ ୧୯୬୦ ଦଶକରେ ତାଙ୍କର କେରିୟର ଆରମ୍ଭ କରିଥିଲେ, ଯେତେବେଳେ ୧୯୬୫ ମସିହାରେ ଫିଲ୍ମଫେୟାର ପକ୍ଷରୁ ପ୍ରଯୋଜିତ ୟୁନାଇଟେଡ୍ ଫିଲ୍ମ ପ୍ରୋଡ୍ୟୁସର୍ସ ଟାଲେଣ୍ଟ ହଣ୍ଟ ପ୍ରତିଯୋଗିତାରେ ସେ ବିଜୟୀ ହୋଇଥିଲେ। ସେ ଓ ରାଜେଶ ଖନ୍ନା ଅନ୍ତିମ ପ୍ରତିଯୋଗୀ ଭାବେ ଚୟନ ହୋଇଥିଲେ ଓ ଦୁହେଁକୁ ଫିଲ୍ମଫେୟାର ପୁରସ୍କାର ଅବସରରେ ବିଜେତା ଭାବେ ମଞ୍ଚରେ ସମ୍ମାନିତ କରାଯାଇଥିଲା। ପ୍ରେକ୍ଷକ ମଣ୍ଡଳୀରେ ଉପସ୍ଥିତ ଥିବା ତାରାଚନ୍ଦ ବରଜାତ୍ୟା ତାଙ୍କୁ ତକଦୀର ଫିଲ୍ମ ପାଇଁ ପ୍ରଥମ ଅବସର ଦେଇଥିଲେ।

୨୦୧୪ ମସିହାର ଏକ ସାକ୍ଷାତ୍କାରରେ ତାଙ୍କର ପ୍ରାରମ୍ଭିକ କେରିୟର ବିଷୟରେ ପଚାରାଯାଇଥିବାବେଳେ ସେ କହିଥିଲେ: “ମୁଁ ପଞ୍ଚଗଣୀର ସେଣ୍ଟ ଜୋସେଫ୍ସ କନ୍ଭେଣ୍ଟ୍ ସ୍କୁଲ୍ ଛାଡ଼ିବା ପରେ ତକଦୀର ନାମକ ଫିଲ୍ମରେ ଅଭିନୟ ଆରମ୍ଭ କରିଥିଲି। ମୁଁ ଏକ ଟାଲେଣ୍ଟ ପ୍ରତିଯୋଗିତାରେ ଭାଗ ନେଇଥିଲି ଓ ଜିତିଥିଲି। କାକା (ରାଜେଶ ଖନ୍ନା) ଓ ମୁଁ ଅନ୍ତିମ ପ୍ରତିଯୋଗୀ ଥିଲୁ। ମୁଁ କିପରି ଜାଣିପାରୁଥାଏ ଯେ ଶିଘ୍ରେ ମୁଁ ତାଙ୍କ ସହିତ ଆରାଧନା ଫିଲ୍ମରେ କାମ କରିବି?”

୨୦୦୩ ମସିହାରେ ଜଲାଲ ଶରାରତ ଧାରାବାହିକରେ ଅଭିନୟ କରିଥିଲେ, ଯେଉଁଠାରେ ସେ ମୁଖ୍ୟ ଭୂମିକାରେ ଦେଖାଯାଇଥିଲେ। 2005 ମସିହାରେ ସେ ମୁମ୍ବାଇରେ ଆୟୋଜିତ ୫୦ତମ ଫିଲ୍ମଫେୟାର ପୁରସ୍କାର ଅବସରକୁ ସୈଫ ଅଲି ଖାନ୍ ଓ ସୋନାଲି ବେନ୍ଦ୍ରେଙ୍କ ସହିତ ସହ-ସଂଚାଳନା କରିଥିଲେ। ୨୦୦୮ ମସିହାରେ ସେ ପଞ୍ଜାବୀ ଚଳଚ୍ଚିତ୍ର ଯାରିୟାନ୍ରେ ବିଶେଷ ଅତିଥି ଭୂମିକାରେ ଅଭିନୟ କରିଥିଲେ। ପରବର୍ତ୍ତୀକାଳରେ ସେ ଟେଲିଭିଜନ ଧାରାବାହିକ ବାଲିକା ବଧୁରେ ମଧ୍ୟ ଅଭିନୟ କରିଥିଲେ।

ବ୍ୟକ୍ତିଗତ ଜୀବନ

ଜଲାଲଙ୍କ ବିବାହ ଅଭିନେତା ତବ୍ରେଜ ବର୍ମାଭାରଙ୍କ ସହିତ ହୋଇଥିଲା, ଯିଏ କର୍ଣ୍ଣାଟକର ଭାଟକଳର ନିବାସୀ ଥିଲେ। ସେ ଜୀବନ ରେଖା ଫିଲ୍ମର ଶୁଟିଂ ସମୟରେ ତାଙ୍କ ସ୍ୱାମୀଙ୍କ ସହିତ ପରିଚିତ ହୋଇଥିଲେ ଓ ସେଠାରେ ଦୁହେଁଙ୍କ ମଧ୍ୟରେ ପ୍ରେମ ଜନ୍ମ ନେଇଥିଲା। ପରେ ୧୯୭୮ ମସିହାର ନଭେମ୍ବର ମାସରେ ସେମାନେ ବିବାହ କରିଥିଲେ। ଏହି ଦମ୍ପତି ବେଙ୍ଗାଲୁରୁକୁ ସ୍ଥାନାନ୍ତରିତ ହୋଇଥିଲେ, ଯେଉଁଠାରେ ତାଙ୍କ ସ୍ୱାମୀଙ୍କର ସାବୁନ କାରଖାନା ବ୍ୟବସାୟ ଥିଲା। ସେମାନଙ୍କର ଯାସିନ୍ ନାମକ ଗୋଟିଏ ପୁଅ ଅଛନ୍ତି। ୨୦୦୩ ମସିହାର ସେପ୍ଟେମ୍ବର ମାସରେ ତାଙ୍କ ସ୍ୱାମୀଙ୍କର ଦେହାନ୍ତ ହୋଇଥିଲା।