ନବଜୀବନ ଟ୍ରଷ୍ଟ

ନବଜୀବନ ଟ୍ରଷ୍ଟ ହେଉଛି ଏକ ପ୍ରକାଶନ ସଂସ୍ଥା, ଯାହା ଭାରତର ଅହମଦାବାଦରେ ଅବସ୍ଥିତ । ଏହାକୁ ୧୯୨୯ ମସିହାରେ ମହାତ୍ମା ଗାନ୍ଧୀ ସ୍ଥାପନା କରିଥିଲେ ଓ ଏପର୍ଯ୍ୟନ୍ତ ଏହି ପ୍ରକାଶନ ସଂସ୍ଥା ଇଂରାଜୀ, ଗୁଜରାଟୀ, ହିନ୍ଦୀ ଓ ଅନ୍ୟାନ୍ୟ ଭାଷାରେ ୮୦୦ରୁ ଅଧିକ ପୁସ୍ତକ ପ୍ରକାଶ କରିଛି । ଆରମ୍ଭରେ, "ନବଜୀବନ" ବାସ୍ତବରେ ଗାନ୍ଧୀଜୀଙ୍କ ଦ୍ୱାରା ୧୯୧୯ (7 ସେପ୍ଟେମ୍ବର) ରୁ ୧୯୩୧ ପର୍ଯ୍ୟନ୍ତ ଅହମଦାବାଦରୁ ପ୍ରକାଶିତ ହେଉଥିବା ଗୋଟିଏ ସାପ୍ତାହିକ ଗୁଜରାଟୀ ସମ୍ବାଦପତ୍ରକୁ ବୁଝାଉଥିଲା ।

ଉଦ୍ଦେଶ୍ୟ

ହିନ୍ଦୀ, ଗୁଜରାଟୀ ଓ ଅନ୍ୟାନ୍ୟ ଇଣ୍ଡୋ-ଆର୍ଯ୍ୟ ଭାଷାରେ ନବଜୀବନ ଶବ୍ଦର ଅର୍ଥ ହେଉଛି "ନୂତନ ଜୀବନ" । ସ୍ଥାପନା ସମୟରେ ଘୋଷଣାରେ କୁହାଯାଇଥିଲା, ନବଜୀବନ ଟ୍ରଷ୍ଟର ଉଦ୍ଦେଶ୍ୟ ହେଉଛି ଶାନ୍ତିପୂର୍ଣ୍ଣ ଉପାୟରେ ହିନ୍ଦ ସ୍ୱରାଜ (ଭାରତର ସ୍ୱରାଜ) ପ୍ରାପ୍ତି ପାଇଁ ଜନତାଙ୍କୁ ସଚେତନ କରିବା । ଏଥିପାଇଁ ପ୍ରଶିକ୍ଷିତ ଓ ଆଦର୍ଶ କର୍ମୀମାନଙ୍କ ଦ୍ୱାରା ଶିକ୍ଷା ପ୍ରଦାନ କରିବା ଓ ଏହି ଶୁଦ୍ଧ ଭାବନାରେ ଭାରତକୁ ସେବା କରିବା ।ଏହି ଉଦ୍ଦେଶ୍ୟ ପୂରଣ ପାଇଁ "ନବଜୀବନ" (ନୂତନ ଜୀବନ) ଶାନ୍ତିପୂର୍ଣ୍ଣ ଉପାୟରେ ସ୍ୱରାଜ ପାଇଁ ବହୁବିଧ ବିଷୟରେ ପ୍ରଚାର କରିବା ପାଇଁ ନିଷ୍ପତ୍ତି ନେଇଥିଲା । ଯେପରିକି;

• ଚରଖା ଓ ଖାଦିର ପ୍ରଚାର କରିବା ।
• ଅସ୍ପୃଶ୍ୟତାର ଉଚ୍ଛେଦ ପାଇଁ ପ୍ରଚାର କରିବା ।
• ହିନ୍ଦୁ–ମୁସଲମାନ ଓ ଭାରତରେ ଥିବା ଅନ୍ୟାନ୍ୟ ସମାଜ ମଧ୍ୟରେ ଏକତା ପ୍ରଚାର କରିବା ।
• ଲୋକମାନଙ୍କୁ ଆୟ ସୁରକ୍ଷା ପାଇଁ ନିର୍ମାଣାତ୍ମକ ପଦ୍ଧତି ଦେଖାଇବା—ଯଥା ଟାନେରୀ, ଡେରୀ ଓ ଅନ୍ୟାନ୍ୟ ସଂସ୍ଥା ସ୍ଥାପନ ଓ ପରିଚାଳନ ପାଇଁ ପ୍ରଚାର କରିବା ।
• ନାରୀ ଉନ୍ନତି ପାଇଁ ପ୍ରଚାର କରିବା, ଯେପରି—
  1. ବାଲ୍ୟବିବାହକୁ ବିରୋଧ କରିବା
  2. ସୀମିତ ଭାବରେ ବିଧବା ପୁନର୍ବିବାହର ପ୍ରଚାର
  3. ମହିଳାଙ୍କୁ ସାକ୍ଷର କରିବା
• ଇଂରାଜୀ ଭାଷାକୁ ଲୋକମାନଙ୍କ ଚକ୍ଷୁରେ ଯେ ଅସ୍ୱାଭାବିକ ଆକର୍ଷଣ ମିଳିଛି ତାହାକୁ ଭାଙ୍ଗିଦେବା ଓ ତାହାର ପରିବର୍ତ୍ତେ ହିନ୍ଦୀ କିମ୍ବା ହିନ୍ଦୁସ୍ତାନୀକୁ ସ୍ଥାପିତ କରିବା ।
• ସମାଜର ଧାର୍ମିକ, ସାମାଜିକ, ଅର୍ଥନୈତିକ ଓ ରାଜନୈତିକ ଉନ୍ନତି ପାଇଁ ପତ୍ରିକା ଓ ପୁସ୍ତକ ପ୍ରକାଶ କରିବା ।
• ଟ୍ରଷ୍ଟର ପ୍ରକାଶିତ ସମ୍ବାଦପତ୍ର, ପ୍ୟାମ୍ଫ୍ଲେଟ୍‌ କିମ୍ବା ପୁସ୍ତକରେ ବିଜ୍ଞାପନ ନେବା ନୁହେଁ ଓ ପ୍ରିଣ୍ଟିଂ ପ୍ରେସ୍‌ରେ ଟ୍ରଷ୍ଟର ଉଦ୍ଦେଶ୍ୟ ବିରୋଧୀ କାମ କରିବା ନୁହେଁ ।
• ପ୍ରତିବର୍ଷ ପ୍ରଶାସନିକ ବର୍ଷ ଶେଷରୁ ତିନି ମାସ ମଧ୍ୟରେ ସମସ୍ତ କାର୍ଯ୍ୟକଳାପ ଓ ହିସାବର ପ୍ରତିବେଦନ ପ୍ରକାଶ କରିବା ।
• ସମସ୍ତ କାର୍ଯ୍ୟକଳାପ ଆତ୍ମନିର୍ଭରତାର ଆଧାରରେ କରାଯିବ ।

ନବଜୀବନ ଟ୍ରଷ୍ଟ ଲୋକମାନଙ୍କ ଧାର୍ମିକ, ସାମାଜିକ, ଅର୍ଥନୈତିକ ଓ ରାଜନୈତିକ ଉନ୍ନତି ପାଇଁ ଗାନ୍ଧୀଜୀ ଆରମ୍ଭ କରିଥିବା କାର୍ଯ୍ୟକଳାପକୁ ପତ୍ରିକା ଓ ପୁସ୍ତକ ମାଧ୍ୟମରେ ପ୍ରଚାର କରୁଥିଲା । ସମସ୍ତ କାର୍ଯ୍ୟକଳାପ ଆତ୍ମନିର୍ଭର ଆଧାରରେ କରାଯାଉଥିଲା । ଆତ୍ମନିର୍ଭରତା ପାଇଁ ପ୍ରେସ୍‌ରେ କେବଳ ସେହି କାମକୁ ଗ୍ରହଣ କରାଯାଉଥିଲା ଯାହା ଟ୍ରଷ୍ଟର ଉଦ୍ଦେଶ୍ୟ ସହିତ ବିରୋଧୀ ନୁହେଁ । ନବଜୀବନ ଟ୍ରଷ୍ଟର ଟ୍ରଷ୍ଟିମାନେ ତାଙ୍କ ଆଦର୍ଶକୁ ଏପର୍ଯ୍ୟନ୍ତ କଠୋରତାର ସହ ଅନୁସରଣ କରିଆସିଛନ୍ତି, ଯଦିଓ ପରବର୍ତ୍ତୀ ସମୟରେ ଲାଭଜନକ ପ୍ରିଣ୍ଟିଂ କାମକୁ ପରିତ୍ୟାଗ କରିବାକୁ ପଡ଼ିଛି । ସେହିପରି, ଟ୍ରଷ୍ଟର ପ୍ରକାଶିତ ସାପ୍ତାହିକ, ପତ୍ରିକା କିମ୍ବା ପୁସ୍ତକରେ କେବେ ବିଜ୍ଞାପନ ନେଇ ନାହାନ୍ତି ଏବଂ ଏପର୍ଯ୍ୟନ୍ତ ଟ୍ରଷ୍ଟ କୌଣସି ସରକାରୀ ଅନୁଦାନ ବା ଦାନ ଗ୍ରହଣ କରିନାହିଁ ।