ଜଗଦୀଶ ସିଂହ ଖେହର

ଜଗଦୀଶ ସିଂହ ଖେହର (ଜନ୍ମ ୨୮ ଅଗଷ୍ଟ ୧୯୫୨) ଜଣେ ଭାରତୀୟ ବିଧିବିଶାରଦ, ଯିଏ ୪ ଜାନୁଆରୀ ୨୦୧୭ରୁ ୨୭ ଅଗଷ୍ଟ ୨୦୧୭ ପର୍ଯ୍ୟନ୍ତ ଭାରତର ୪୪ତମ ମୁଖ୍ୟ ନ୍ୟାୟାଧୀଶ ଭାବେ କାର୍ଯ୍ୟରତ ଥିଲେ। ସେ ଭାରତର ପ୍ରଥମ ସିଖ ମୁଖ୍ୟ ନ୍ୟାୟାଧୀଶ ଥିଲେ। ସେ ୧୩ ସେପ୍ଟେମ୍ବର ୨୦୧୧ରୁ ୨୭ ଅଗଷ୍ଟ ୨୦୧୭ ପର୍ଯ୍ୟନ୍ତ ସୁପ୍ରିମ୍ କୋର୍ଟର ନ୍ୟାୟାଧୀଶ ଭାବେ କାମ କରିଥିଲେ । କିଛି ସମୟର ଛୋଟ କାର୍ଯ୍ୟକାଳ ଥିବା ସତ୍ୱେ ମଧ୍ୟ ସେ ତିନି ତଲାକ ମାମଲା, ଗୋପନୀୟତା ଅଧିକାର ଇତ୍ୟାଦି ଐତିହାସିକ ରାୟ ଦେଇଥିଲେ । ତାଙ୍କ ଅବସର ପରେ ସେହି ପଦବୀ ନ୍ୟାୟମୂର୍ତ୍ତି ଦୀପକ ମିଶ୍ର ପୂରଣ କରିଥିଲେ । ଭାରତର ମୁଖ୍ୟ ନ୍ୟାୟାଧୀଶ ଭାବେ ସେ ଭାରତର ୧୪ତମ ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ପଦ ଶପଥ ଦେଇଥିଲେ ।

ବୃତ୍ତିଜୀବନ

• ସେ ୮ ଫେବ୍ରୁଆରୀ ୧୯୯୯ରେ ପଞ୍ଜାବ ଏବଂ ହରିୟାଣା ହାଇକୋର୍ଟର ଚଣ୍ଡୀଗଡ଼ ବେଞ୍ଚ ରେ ନ୍ୟାୟାଧୀଶ ଭାବେ ନିଯୁକ୍ତ ହୋଇଥିଲେ।
• ୨ ଅଗଷ୍ଟ ୨୦୦୮ ରୁ ଏବଂ ପୁନଃ ୧୭ ନଭେମ୍ବର ୨୦୦୯ରୁ ସେ କାର୍ଯ୍ୟବାହକ ମୁଖ୍ୟ ନ୍ୟାୟାଧୀଶ ଭାବେ କାମ କରିଥିଲେ।
• ୨୯ ନଭେମ୍ବର ୨୦୦୯ରେ ସେ ଉତ୍ତରାଖଣ୍ଡ ହାଇକୋର୍ଟର ମୁଖ୍ୟ ନ୍ୟାୟାଧୀଶ ଭାବେ ନିଯୁକ୍ତ ହେଲେ, ପରେ ସେ କର୍ଣ୍ଣାଟକ ହାଇକୋର୍ଟର ମୁଖ୍ୟ ନ୍ୟାୟାଧୀଶ ଭାବେ ୮ ଅଗଷ୍ଟ ୨୦୨୦ ରେ ପଦଗ୍ରହଣ କଲେ।
• ସେ ୧୩ ସେପ୍ଟେମ୍ବର ୨୦୧୧ରେ ଭାରତୀୟ ସୁପ୍ରିମ୍ କୋର୍ଟର ନ୍ୟାୟାଧୀଶ ଭାବେ ପଦଗ୍ରହଣ କଲେ ଏବଂ ୪ ଜାନୁଆରୀ ୨୦୧୭ରୁ ୨୭ ଅଗଷ୍ଟ ୨୦୧୭ ପର୍ଯ୍ୟନ୍ତ ମୁଖ୍ୟ ନ୍ୟାୟାଧୀଶ ଭାବେ କାମ କଲେ।

ଗୁରୁତ୍ତ୍ୱପୂର୍ଣ୍ଣ ରାୟଗୁଡ଼ିକ

ନ୍ୟାୟମୂର୍ତ୍ତି ଖେହର ସୁପ୍ରିମ କୋର୍ଟ ଆଡଭୋକେଟ୍ସ ଓନ୍‍ ରେକର୍ଡ୍ ଆସୋସିଏସନ୍ ବନାମ ଯୁନିଅନ୍ ଅଫ୍ ଇଣ୍ଡିଆ [2016(5) SCC 1] ମାମଲାର ପାଞ୍ଚ-ନ୍ୟାୟାଧୀଶୀୟ ସଂବିଧାନ ବେଞ୍ଚର ନେତୃତ୍ୱ ଦେଇଥିଲେ ।ଏହି ରାୟରେ ସେ କଲିଜିଆମ୍ ପ୍ରଣାଳୀକୁ ଜାରି ରଖିବାକୁ ସମର୍ଥନ କରି NJAC ଆଇନକୁ ରଦ୍ଦ କରିଥିଲେ ଏବଂ ସଂବିଧାନର ୯୯ତମ ସଂଶୋଧନକୁ ଅସଂବିଧାନିକ ଘୋଷଣା କରିଥିଲେ ।