ଇଣ୍ଡିଆନ୍ ଓପିନିୟନ୍ (ଖବରକାଗଜ)
ଇଣ୍ଡିଆନ୍ ଓପିନିୟନ୍ ହେଉଛି ଏକ ସମ୍ବାଦପତ୍ର ଯାହାକି ଭାରତୀୟ ସ୍ୱାଧୀନତା ସଂଗ୍ରାମୀ ମହାତ୍ମା ଗାନ୍ଧୀ ସ୍ଥାପନା କରିଥିଲେ। ଏହା ଗାନ୍ଧୀ ଓ ନାଟାଲ୍ ଇଣ୍ଡିଆନ୍ କଂଗ୍ରେସ୍ ଦ୍ୱାରା ଦକ୍ଷିଣ ଆଫ୍ରିକାରେ ଭାରତୀୟ ଓ ସ୍ଥାନୀୟ ଆଫ୍ରିକୀୟମାନଙ୍କୁ ବର୍ଣ୍ଣବୈଷମ୍ୟ ଭେଦଭାବରୁ ମୁକ୍ତ କରିବା ତଥା ନାଗରିକ ଅଧିକାର ପାଇଁ ସଂଗ୍ରାମକୁ ସଫଳ କରିବାରେ ଏକ ପ୍ରମୁଖ ଭୂମିକା ଗ୍ରହଣ କରିଥିଲା । ୧୯୦୩ ମସିହାରୁ ଆରମ୍ଭ ହୋଇ, ଏହା ୧୯୬୧ ପର୍ଯ୍ୟନ୍ତ ପ୍ରକାଶିତ ହୋଇଥିଲା ।
ଫିନିକ୍ସ ସେଟଲମେଣ୍ଟରେ ଅବସ୍ଥିତ ଏହି ସମ୍ବାଦପତ୍ର କାର୍ଯ୍ୟାଳୟ, ୨୦୨୦ରେ ଦକ୍ଷିଣ ଆଫ୍ରିକା ସରକାର ଦ୍ୱାରା ଏକ ଜାତୀୟ ଐତିହ୍ୟ ସ୍ଥଳୀ ଭାବେ ଘୋଷିତ ହୋଇଥିଲା ।[୧]
ଇତିହାସ
[ସମ୍ପାଦନା]ଉନ୍ନବିଂଶ ଶତାବ୍ଦୀରେ, ଦକ୍ଷିଣ ଆଫ୍ରିକାର ବୃଦ୍ଧିଶୀଳ ଅର୍ଥନୀତିକୁ ପୂରଣ କରିବା ପାଇଁ ଭାରତୀୟମାନଙ୍କୁ ଗୋତି ଶ୍ରମିକ ଭାବେ ଆଣାଯାଇଥିଲା । ବିଭିନ୍ନ ଜାତି-ଗୋଷ୍ଠୀ ସମୁଦାୟଙ୍କ ସହିତ, ଭାରତୀୟମାନେ ରାଜନୈତିକ, ଆର୍ଥିକ ଓ ସାମାଜିକ ଭେଦଭାବର ଶୀକାର ହୋଇଥିଲେ । ବୋୟାର୍ ଯୁଦ୍ଧ ପରେ, ବୋୟାର୍ ସେନାନୀ ଜାନ୍ ସ୍ମଟ୍ସଙ୍କ ସରକାର ଭାରତୀୟ ଅପ୍ରବାସୀମାନଙ୍କର ନାଗରିକ ଅଧିକାରକୁ ବହୁପରିମାଣରେ ସୀମିତ କରିଦିଆଗଲା ଯେଉଁଥିରେ ପୋଲିସକୁ ୱାରଣ୍ଟ୍ ବିନା ତଲାଶି, ଜବତ ସହିତ ଗିରଫ କରିବାର ଶକ୍ତି ଦିଆଯାଇଥିଲା । ସମସ୍ତ ଭାରତୀୟଙ୍କୁ ସବୁ ସମୟରେ ପରିଚୟପତ୍ର ଦେଖାଇବା ବାଧ୍ୟତାମୂଳକ କରାଯାଇଥିଲା । ନାଟାଲ୍ ପ୍ରାନ୍ତରେ ଏକ ଆଇନଜୀବୀ ଭାବେ କାମ କରୁଥିବା ଗାନ୍ଧୀ ୧୯୦୪ରେ ଦକ୍ଷିଣ ଆଫ୍ରିକାରେ ଭାରତୀୟମାନଙ୍କର ସମସ୍ୟା ଓ ଆବଶ୍ୟକତା ବିଷୟରେ ୟୁରୋପୀୟମାନଙ୍କୁ ସଚେତନ କରିବା ପାଇଁ ଏହି ପ୍ରକାଶନକୁ ସ୍ଥାପନା କରିଥିଲେ ।
ନାଟାଲ୍ ଇଣ୍ଡିଆନ୍ କଂଗ୍ରେସ୍, ତାଙ୍କର ମହକିଲ ଓ ଅନ୍ୟାନ୍ୟ ପ୍ରଭାବଶାଳୀ ଭାରତୀୟଙ୍କର ସମର୍ଥନରେ, ଗାନ୍ଧୀ କିଛି କର୍ମକର୍ତ୍ତା ଓ ଏକ ପ୍ରିଣ୍ଟିଂ ପ୍ରେସ୍ ଯୋଗାଡ଼ କଲେ । ମଦନଜିତ୍ ବ୍ୟାବହାରିକ, ଇଣ୍ଟରନ୍ୟାସନାଲ୍ ପ୍ରିଣ୍ଟିଂ ପ୍ରେସ୍ର ମାଲିକ, ଏହି ପତ୍ରିକାର ପ୍ରଥମ ସଂସ୍କରଣ ୪ ଜୁନ୍ ୧୯୦୩ରେ ମୁଦ୍ରଣ କଲେ, ଯାହା ୬ ଜୁନ୍ରେ ଲୋକଙ୍କ ପାଖରେ ପହଞ୍ଚିଲା । ସମ୍ବାଦପତ୍ରଟି ଗୁଜରାଟୀ, ହିନ୍ଦୀ, ତାମିଳ ଓ ଇଂରାଜୀ ଭାଷାରେ ପ୍ରକାଶିତ ହୋଇଥିଲା । ମନସୁଖଲାଲ୍ ନଜର୍, ନାଟାଲ୍ କଂଗ୍ରେସ୍ର ସଚିବ, ସମ୍ପାଦକ ଭାବେ କାମ କଲେ । ୧୯୦୪ରେ, ଗାନ୍ଧୀ ଏହି ସମ୍ବାଦପତ୍ରର କାର୍ଯ୍ୟାଳୟକୁ ଡର୍ବାନ୍ ପାଖରେ ଥିବା ନିଜ ଫିନିକ୍ସ ସେଟଲମେଣ୍ଟକୁ ସ୍ଥାନାନ୍ତର କଲେ । ସେଠାରେ, ପ୍ରେସ୍ କର୍ମଚାରୀମାନେ ଏକ ନୂତନ ନୀତିରେ କାର୍ଯ୍ୟ ସଂପାଦନ କରୁଥିଲେ, ଯେପରିକି ସମସ୍ତ କର୍ମକର୍ତ୍ତାଙ୍କ ସମ୍ବାଦପତ୍ର ସଂସ୍ଥାର ଅଧୀନସ୍ଥ ଜମିରେ ଅଂଶୀଦାର ଥିଲେ । ଏହାଛଡ଼ା ସେମାନେ ସେହି ଜମିରେ ସ୍ୱୟଂଜୀବିକା ପାଇଁ ଚାଷ କରୁଥିଲେ ଏବଂ ସମ୍ବାଦପତ୍ର ପ୍ରକାଶନ ସାମୁହିକ ଭାବରେ ପରିଚାଳନା କରୁଥିଲେ ।
ସମ୍ବାଦପତ୍ରର ସମ୍ପାଦକମାନଙ୍କ ମଧ୍ୟରେ ହେବର୍ଟ କିଚିନ୍, ହେନ୍ରି ପୋଲାକ୍, ଆଲ୍ବର୍ଟ ୱେଷ୍ଟ୍, ମଣିଲାଲ୍ ଗାନ୍ଧୀ (୩୬ ବର୍ଷ ସବୁଠାରୁ ଦୀର୍ଘ ସମୟ ସମ୍ପାଦକ) ଓ ସୁଶିଳା ଗାନ୍ଧୀ (ମଣିଲାଲଙ୍କ ମୃତ୍ୟୁ ପରେ ଦାୟିତ୍ୱ ନେଇଥିଲେ) ଥିଲେ । ଜଣକ ବ୍ୟତିରେକ ପ୍ରାୟ ସମସ୍ତ ସମ୍ପାଦକ କିଛି ସମୟ ଜେଲ୍ରେ ରହିଥିଲେ ।[୨]
ପ୍ରକାଶନ ନୀତି
[ସମ୍ପାଦନା]ଇଣ୍ଡିଆନ୍ ଓପିନିୟନ୍ ଆରମ୍ଭରୁ ସରକାର ବିପକ୍ଷରେ ଆକ୍ରମଣାତ୍ମକ ଭାବ ପୋଷଣ ନ କରି ଶାନ୍ତ ଧାରା ଅନୁସରିଥିଲା ଏବଂ ଆଇନାନୁମୋଦିତ ଧାରାରେ ବିଶ୍ୱାସ ଦେଖାଇଥିଲା । କିନ୍ତୁ, ଏହା ଭାରତୀୟ ଗୋତି ଶ୍ରମିକମାନଙ୍କର ଦୟନୀୟ ଅବସ୍ଥାକୁ ବିଶେଷ ଭାବେ ପ୍ରକାଶ କରିଥିଲା । କୃଷିକ୍ଷେତ୍ରରେ ଅମାନବିକ ପରିସ୍ଥିତି, ମାଲିକଙ୍କ ଦ୍ୱାରା ଅତ୍ୟାଚାର, ଶୋଷଣ ଓ ଆତ୍ମହତ୍ୟାର ଭୟାବହ ହାରକୁ ଏଥିରେ ପ୍ରକାଶ କରାଯାଇଥିଲା । ଏହିପରି ଏହି ଅବାଞ୍ଛିତ ପ୍ରଥାକୁ ଶେଷ କରିବାକୁ ଅଭିଯାନ ଆରମ୍ଭ ହେଲା ।
୧୯୦୬ରୁ, ଏହା ବ୍ରିଟିଶ ରାଜର ଅନ୍ୟାୟକୁ ବିରୋଧ କରିବା ସହ ଶୋଷଣ ବିରୁଦ୍ଧରେ ସ୍ଵର ଉତ୍ତୋଳନ କରିବା ଆରମ୍ଭ କଲା । 1906-1913ର ସତ୍ୟାଗ୍ରହ ଆନ୍ଦୋଳନରେ ଏହି ପ୍ରଥା ଦୃଢ଼ ହେଲା, ଯେତେବେଳେ ଟ୍ରାନ୍ସଭାଲରେ ଭାରତୀୟଙ୍କୁ ଅନ୍ୟାୟ ଭାବେ ପାସ୍ ନେବାକୁ ବାଧ୍ୟ କରାଯାଇଥିଲା । ଏହା ଆଫ୍ରିକୀୟମାନଙ୍କ ବିରୋଧରେ ହେଉଥିବା ଉପନିବେଶୀୟ ଭେଦଭାବକୁ ମଧ୍ୟ ପ୍ରକାଶ କରୁଥିଲା । ୨୨ ଅକ୍ଟୋବର ୧୯୧୦ରେ, ଗାନ୍ଧୀ ଲେଖିଥିଲେ:
"ଆଫ୍ରିକୀୟମାନେ ଏହି ଭୂମିର ମୂଳ ଅଧିବାସି। ଆମେ ସେମାନଙ୍କର ଭୂମିକୁ ବଳପୂର୍ବକ ନେଇନାହୁଁ; ସେମାନଙ୍କର ସମ୍ମତି ସହିତ ଆମେ ରହୁଛୁ। କିନ୍ତୁ ଗୋରାମାନେ ଶକ୍ତି ପ୍ରୟୋଗ କରି ସେମାନଙ୍କ ଦେଶକୁ ଦଖଲ କରିଛନ୍ତି।"
ସମ୍ବାଦପତ୍ରଟି ଅରେଞ୍ଜ ଫ୍ରି ଷ୍ଟେଟ୍ରେ ଆଫ୍ରିକୀୟ ନାରୀଙ୍କ ଆନ୍ଦୋଳନକୁ ମଧ୍ୟ ପ୍ରସାର କଲା ଏବଂ ଜନ୍ ଲାଙ୍ଗାଲିବାଲେଲେ ଡ୍ୟୁବେଙ୍କ Natives Land Act ବିରୋଧକୁ ଦୃଢ ସମର୍ଥନ କଲା ।[୩]
ଐତିହ୍ୟ
[ସମ୍ପାଦନା]ଇଣ୍ଡିଆନ୍ ଓପିନିୟନ୍ ବ୍ରିଟିଶ କଲୋନୀରେ ରହୁଥିବା ଭାରତୀୟମାନଙ୍କର ନିସ୍ପକ୍ଷ ସମାଚାରକୁ ଭାରତର ଲୋକଙ୍କ ମଧ୍ୟରେ ପହୁଞ୍ଚାଇବାର ଏକ ବିଶ୍ୱସନୀୟ ମାଧ୍ୟମ ଥିଲା । ଭାରତୀୟମାନେ ଯେଉଁଭଳି ଭାବେ ଅନ୍ୟାୟରେ ପୀଡ଼ିତ ହୋଇଥିଲେ, ସେଥି ସମ୍ପର୍କିତ ଟିକିନିଖି ଦଲିଲ ଏହି ସମ୍ବାଦପତ୍ରରେ ସ୍ଥାନ ପାଇଥିଲା । ଏହାର ପ୍ରକାଶନ ମାଧ୍ୟମରେ ଗାନ୍ଧୀଙ୍କୁ ଦକ୍ଷିଣ ଆଫ୍ରିକାର ସଂଗ୍ରାମରୁ ଯେଉଁ ମହତ୍ତ୍ୱପୂର୍ଣ୍ଣ ଅନୁଭବ ଦେଲା, ତାହା ପରବର୍ତ୍ତୀ ସମୟରେ ଭାରତର ସ୍ୱାଧୀନତା ଆନ୍ଦୋଳନରେ ସାହାଯ୍ୟ କଲା । ସେ କହିଥିଲେ "ଇଣ୍ଡିଆନ୍ ଓପିନିୟନ୍ ବିନା ସତ୍ୟାଗ୍ରହ ସମ୍ଭବ ହୋଇ ନଥାନ୍ତା " ।
ଏହି ପତ୍ରିକା ସ୍ଥାନୀୟ ଆଫ୍ରିକୀୟମାନଙ୍କ ବିରୋଧରେ ହୋଇଥିବା ବର୍ଣ୍ଣଭେଦୀୟ ଅନ୍ୟାୟର ନିରପେକ୍ଷ ଦଲିଲ ପାଇଁ ମଧ୍ୟ ସ୍ମରଣୀୟ ।
ଭାରତରେ, ଗାନ୍ଧୀ ୟୁଙ୍ଗ୍ ଇଣ୍ଡିଆ, ହରିଜନ ଓ ନବଜୀବନ ପ୍ରକାଶ କରିଥିଲେ । ଇଣ୍ଡିଆନ୍ ଓପିନିୟନ୍ ଦକ୍ଷିଣ ଆଫ୍ରିକାର ନାଗରିକ ଅଧିକାର ଆନ୍ଦୋଳନରେ ଦୀର୍ଘ ସମୟ ପର୍ଯ୍ୟନ୍ତ ଗୁରୁତ୍ୱପୂର୍ଣ୍ଣ ଭୂମିକା ନିବାହ କରିଥିଲା।
ଫିନିକ୍ସ ସେଟଲମେଣ୍ଟକୁ 2000ରେ ପୁନରୁଦ୍ଧାର କରାଯାଇଥିଲା ଏବଂ ୨୦୨୦ରେ ଦକ୍ଷିଣ ଆଫ୍ରିକା ସରକାର ଦ୍ୱାରା ଜାତୀୟ ଐତିହ୍ୟ ସ୍ଥଳୀ ଭାବେ ଘୋଷିତ ହୋଇଥିଲା ।[୧]
ଆଧାର
[ସମ୍ପାଦନା]- ↑ ୧.୦ ୧.୧ "Retracing Gandhi's footsteps". Deccan Herald (in ଇଂରାଜୀ). Retrieved 2025-09-29.
- ↑ "History of the 'Indian Opinion' newspaper | South African History Online". sahistory.org.za (in ଇଂରାଜୀ). Retrieved 2025-09-29.
- ↑ "Wayback Machine" (PDF). sahistory.org.za. Retrieved 29 September 2025.
 | ଏହି ପ୍ରସଙ୍ଗଟି ଅସମ୍ପୂର୍ଣ୍ଣ । ଆପଣ ଏହାକୁ ସଂପୂର୍ଣ୍ଣ କରି ଉଇକିପିଡ଼ିଆକୁ ସମୃଦ୍ଧ କରିପାରିବେ । |