ଅଶୋକ କୁମାର ରଥ
ଅଶୋକ କୁମାର ରଥ | |
|---|---|
| ଜନ୍ମ ଓ ଜନ୍ମସ୍ଥାନ | ୨୪ ଜୁନ ୧୯୪୦ ଆଙ୍କୁଶପୁର, ବ୍ରହ୍ମପୁର, ଗଞ୍ଜାମ |
| ଭାଷା | ଓଡ଼ିଆ |
| ଜାତୀୟତା | ଭାରତୀୟ |
| ଶୈଳୀ | ସମାଲୋଚନା ସାହିତ୍ୟ |
| ସାହିତ୍ୟ କୃତି | ଜୈନଧର୍ମ ଓ ସଂସ୍କୃତି |
| ପୁରସ୍କାର | ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର, ୧୯୯୨ |
| ଜୀବନସାଥୀ | ଚାରୁଶୀଳା ରଥ |
| ପିତାମାତା | ଆଦିକନ୍ଦ ରଥ (ପିତା), ପଦ୍ମାବତୀ ରଥ (ମାତା) |
ଅଶୋକ କୁମାର ରଥ (ଜନ୍ମ ୨୪ ଜୁନ ୧୯୪୦) ଜଣେ ପ୍ରାଧ୍ୟାପକ, ଐତିହାସିକ, ଅଭିନେତା ଓ କ୍ରୀଡ଼ାବିତ୍ । ସେ ନିଜର ଗବେଷଣା ଗ୍ରନ୍ଥ ଜୈନଧର୍ମ ଓ ସଂସ୍କୃତି ପାଇଁ ୧୯୯୨ ମସିହାରେ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର ପାଇଥିଲେ ।[୧]
ସଂକ୍ଷିପ୍ତ ଜୀବନୀ
[ସମ୍ପାଦନା]ଅଶୋକ କୁମାର ରଥ ୧୯୪୦ ମସିହା ଜୁନ ମାସ ୨୪ ତାରିଖରେ ଗଞ୍ଜାମ ଜିଲ୍ଲାର ବ୍ରହ୍ମପୁର ଅନ୍ତର୍ଗତ ଆଙ୍କୁଶପୁରଠାରେ ଜନ୍ମ ଗ୍ରହଣ କରିଥିଲେ । ତାଙ୍କ ପିତାଙ୍କ ନାମ ଥିଲା ଆଦିକନ୍ଦ ରଥ ଓ ମା'ଙ୍କ ନାମ ପଦ୍ମାବତୀ ରଥ । ସେ ୧୯୫୪ରେ ମାଟ୍ରିକ, ୧୯୫୮ରେ ରେଭେନସାରୁ ସ୍ନାତକ ଓ ପ୍ରାଚୀନ ଇତିହାସ, ସଂସ୍କୃତି ଓ ପ୍ରତ୍ନତତ୍ତ୍ୱରେ ଆହ୍ଲାବାଦ ବିଶ୍ୱବିଦ୍ୟାଳୟରୁ ପ୍ରଥମ ଶ୍ରେଣୀରେ ସ୍ନାତକୋତ୍ତର ଉତ୍ତୀର୍ଣ୍ଣ ହୋଇଥିଲେ । ବୃତ୍ତିଗତ ଜୀବନରେ ସେ ଅଧ୍ୟାପକ ଭାବେ ଉତ୍କଳ ବିଶ୍ୱବିଦ୍ୟାଳୟର ସ୍ନାତକୋତ୍ତର ଇତିହାସ ବିଭାଗରେ (୧୯୬୦-୬୪) ଶିକ୍ଷାଦାନ ଆରମ୍ଭ କରିଥିଲେ । ପରେ ସେ ୧୯୬୨-୬୪ ଓଡ଼ିଶା ରାଜ୍ୟ ସଂଗ୍ରହାଳୟର ସଂଗ୍ରହାଧ୍ୟକ୍ଷ (କ୍ୟୁରେଟର), ଅଧ୍ୟାପକ-ରେଭେନସା କଲେଜ, ଖଲ୍ଲିକୋଟ କଲେଜ, ଏସ୍ କେ ସି ଜି କଲେଜ-ପାରଳାଖେମୁଣ୍ଡି, ସରକାରୀ ପ୍ରାତଃ ମହାବିଦ୍ୟାଳୟ-ଫୁଲବାଣୀ, ସାରକାରୀ ବଜ୍ଞାନ ମହାବିଦ୍ୟାଳୟ-ଛତ୍ରପୁର, ବିନାୟକ ଆଚାର୍ଯ୍ୟ ମହାବିଦ୍ୟାଳୟ-ବ୍ରହ୍ମପୁର ଏବଂ କୁଳସଚିବ ଭାବେ ବ୍ରହ୍ମପୁର ବିଶ୍ୱବିଦ୍ୟାଳୟରେ ଦାୟିତ୍ୱ ସମ୍ପାଦନ କରିଥିଲେ । ଶେଷରେ ଆଞ୍ଚଳିକ ଉଚ୍ଚ ଶିକ୍ଷା ନିର୍ଦ୍ଦେଶକ ଭାବେ ୩୦ ଜୁନ୍ ୧୯୯୮ରେ ଅବସର ଗ୍ରହଣ କଲେ ।
ଜଣେ ଐତିହାସିକ ତଥା ପ୍ରତ୍ନତତ୍ତ୍ୱବିତ୍ ଭାବେ ସେ ଓଡ଼ିଶାର ବିଭିନ୍ନା ଜିଲ୍ଲା ଯଥା ନବରଙ୍ଗପୁର, ଅନୁଗୁଳ, ଗଞ୍ଜାମ ଏବଂ ପ୍ରତ୍ନତାତ୍ତ୍ୱିକ ଉତ୍ତରପ୍ରଦେଶର କୌଶାମ୍ବୀ ଅଞ୍ଚଳରେ ଉତଖନନ କରିବା ସହିତ ଐତିହାସିକ କେଦାରନାଥ ମହାପାତ୍ରଙ୍କ ସହଯୋଗୀ ଭାବେ ଭୁବନେଶ୍ୱରର ଲକ୍ଷ୍ମଣେଶ୍ୱର, ଭରତେଶ୍ୱର ଓ ଶତ୍ରୁଘ୍ନେଶ୍ୱର ମନ୍ଦିରଗୁଡ଼ିକର ସଂରକ୍ଷଣ ନିମନ୍ତେ କାର୍ଯ୍ୟ କରିଥିଲେ । ୧୯୬୦ରୁ ଏ ଅବଧି ତାଙ୍କର ଶତାଧିକ ପ୍ରବନ୍ଧ ଓ ଆଲୋଚନା ଝଙ୍କାର, ଡଗର, ପୌରୁଷ, ପୁଷ୍ପଗିରି, ସ୍ପନ୍ଦନ, ଦକ୍ଷିଣାବର୍ତ୍ତ, ମର୍ଦ୍ଦରାଜ ସ୍ମରଣିକା, ସମନ୍ୱୟ, ଦକ୍ଷିଣ ଓଡ଼ିଶାର ଲୋକନୃତ୍ୟ, ଓଡ଼ିଶା ଇତିହାସ କଂଗ୍ରେସ ସ୍ମରଣିକା, ସମାଜ, ପ୍ରଜାତନ୍ତ୍ର, କଳିଙ୍ଗ ମାତୃଭୂମି। ସମ୍ବାଦ, ଉତ୍କଳ ପ୍ରସଙ୍ଗ ଆଦିରେ ପ୍ରକାଶିତ ।[୨][୩]
ରଚନାବଳୀ
[ସମ୍ପାଦନା]ଓଡ଼ିଆ
[ସମ୍ପାଦନା]- ଅଭିନବ ପୃଥିବୀ ଇତିହାସ
- ମାଧ୍ୟମିକ ଭାରତ ଇତିହାସ
- ଅଭିନବ ଓଡ଼ିଶା ଇତିହାସ
- ଜୈନଧର୍ମ ଓ ସଂସ୍କୃତି[୪]
- ଦକ୍ଷିଣ ଓଡ଼ିଶାର ପ୍ରତ୍ନତାତ୍ତ୍ୱିକ ବିଭବ ୧ମ ଭାଗ
- ପ୍ରାଚୀନ ଭାରତ ଇତିହାସ
- ଓଡ଼ିଶାର ରାଜନୈତିକ ଇତିବୃତ୍ତ
- ଯୁଗେ ଯୁଗେ ଘୁମୁସର
- ଗୌରବମୟ ବଡ଼ଖେମୁଣ୍ଡି
- ଗଞ୍ଜାମର ସାଂସ୍କୃତିକ ବିଭବ
ଇଂରାଜୀ
[ସମ୍ପାଦନା]- Essential of General Studies
- Studies on some aspects of the History and Culture of Orissa
- History of India
- Ancient India
ସମ୍ମାନ ଓ ପୁରସ୍କାର
[ସମ୍ପାଦନା]- ୧୯୬୪ - ୧୫ଶ ବିଷୁବ ମିଳନରେ ପ୍ରବନ୍ଧ ରଚନା ପାଇଁ ପ୍ରଜାତନ୍ତ୍ର ପ୍ରଚାର ସମିତି ଦ୍ୱାରା ପୁରସ୍କୃତ
- ୧୯୯୦ - ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର, ଜୈନଧର୍ମ ଓ ସଂସ୍କୃତି ପାଇଁ
- ୨୦୦୫ - ଓଡ଼ିଶା ଇତିହାସ କଂଗ୍ରେସ ଦ୍ୱାରା ସମ୍ମାନୀତ
- ୨୦୦୬ କେଦାରନାଥ ଗବେଷଣା ପ୍ରତିଷ୍ଠାନ ପକ୍ଷରୁ ଏକାମ୍ର ସମ୍ମାନ
- ୨୦୦୬ ପଦ୍ମଶ୍ରୀ ସତ୍ୟନାରାୟଣ ରାଜଗୁରୁ ସମ୍ମାନ, ପାରଳାଖେମୁଣ୍ଡି
- ୨୦୧୨ ଫଲଗୁ ସାହିତ୍ୟ ସମ୍ମାନ, ବ୍ରହ୍ମପୁର
- ୨୦୧ ଫୁଲଚନ୍ଦଜୀ ଜନ୍ମଶତାବ୍ଦୀ ସମାରୋହ ରାଷ୍ଟ୍ରୀୟ ସମିତି, କଲିକତା ଓ ଦିଗମ୍ବର ଜୈନ ସମାଜ ସମ୍ମାନ, ଖଣ୍ଡଗିରି, ଭୁବନେଶ୍ୱର
- ୨୦୧୬ ବ୍ରହ୍ମପୁର ବିଶ୍ୱବିଦ୍ୟାଳୟ ସ୍ନାତକୋତ୍ତର ବାଣିଜ୍ୟ ବିଭାଗ ଦ୍ୱାରା ପ୍ରଦତ୍ତ Eminent Person of South Odisha ସମ୍ମାନ
- ୨୦୧୬ ଉତ୍କଳ ପାଠକ ସଂସଦ ସମ୍ମାନ
ଆଧାର
[ସମ୍ପାଦନା]- ↑ http://odishasahityaakademi.org/English/sahitya-award6.php
- ↑ ରଥ, ଅଶୋକ କୁମାର (୨୦୧୮). ଗଞ୍ଜାମର ସାଂସ୍କୃତିକ ବିଭବ. ବ୍ରହ୍ମପୁର: ତାରାତାରିଣୀ ପୁସ୍ତକାଳୟ. pp. ୩୮୨-୮୭. ISBN 81-87135-71-9.
- ↑ ମହାନ୍ତି, ନଗେନ୍ଦ୍ର ନାଥ (୨୦୦୫). ଓଡ଼ିଆ ଚରିତ କୋଷ, ୧ମ ଭାଗ. ନୂଆଦିଲ୍ଲୀ: ପ୍ରତିମା ନାଥ ଟ୍ରଷ୍ଟ. pp. ୭୧. ISBN 81-903352-1-9.
- ↑ ମହାରଣା, ସୁରେନ୍ଦ୍ର କୁମାର (୨୦୧୫). ଓଡ଼ିଆ ସାହିତ୍ୟର ଇତିହାସ. କଟକ: ଓଡ଼ିଶା ବୁକ୍ ଷ୍ଟୋର୍. pp. ୬୦୧. ISBN 81-7400-331-2.